ياموتري من بعد بيعتك ندمان=بيعتك كانت غلطتي في حياتي
وشلون ماندم وانت لك فالحشا شان=عشرة سنين ٍ تسع متواصلاتي
حبيتك بحب القرايب والاخوان=حديد لاكن حبك بوسط ذاتي
يكفيني ان كل ماكنت طفشان= القاك جاهز لي وحافظ وصاتي
تذكر تماشينا على خط عمّان= تذكر حقل ودروبه الضيقاتي!
تذكر ضبا ..والوجه ..وأملج..وعسفان=ورابغ..ومستوره..وينبع..وياتي
من بعدها مكه وهي خير الاوطان=وضلع الهدا وخطوطه المفجعاتي
وبعد آصل الطائف وانا كلي ايمان= انك خويي فالحياه وغناتي
مايوم مشيتك على الخط ضميان=مشربك خمسين الورق والمياتي
من اصلك الطيب ماوقفت عطلان= وغيرك يمين الخط متعطلاتي
يفداك مايصنع وينتج فالالمان= وماجابت امريكا من المركباتي
والله لوماودي اسد ديّان = واوفي قبل لايكتب الله وفاتي
مايملكك غيري من العالم انسان = لوكان تكثر حولي المغرياتي
نهار بعتك كانت احزاني احزان =روّحت من عندك تهل اعبراتي
صحيح ماخنتك لاكن الزمن خان = وانا وفي لاكن تزعزع ثباتي
غالي ..وتبقا لي على مر الازمان = تاريخ واجدد معه ذكرياتي