صغت المشاعر لك حكي مابعد قيل= يطْربك سمعه وترنّم به طيور
وسقت الموده فوق قلبك مخاييل= منها نبت قلبك من اشواقه شعور
وترجمت عشقي فوق دربك هماليل= منها امتلى دربك فراشات وزهور
ولامن وصفتك شعر وصفي كما السيل= يثمر غصون احساس ممحل له دهور
ولامن بغيت اتغزل بكل تفصيل= يهتز وجدانك تباشير وسرور
ولامن رسمتك وصف باحلا التفاصيل= خليتك تظنين نفسك من الحور
وان ابتسامه كافي تبدد الليل= وانك عذوبه كافيه تعذب بحور
وان الصعب والمستحيله تساهيل= ولك العذارى البيض خدام بقصور
حتى القمر والشمس والجدي وسهيل= ظنيتي ان وجهك لهم مصدر النور
وياحسرتي ماشفت منك محاصيل= غير انغماس الروح في عالم الجور
وتثيرك العذال والقال والقيل= وافهمك وانصح وما تسمع الشور
وتدور الزلات وتحط وتشيل= تهايمٍ من نسج راسك وهي زور
ولا جيت يمي جيت كلك غرابيل= وان غبت عن عيني شياطينك حضور
روحي عساني للعوض بالمقابيل= وصبرٍ على هالحال ماني بمجبور
باقي تحملني وزر قتل هابيل= واني سبب ديمومة ابليس مغرور
واني محرض ابرهه صاحب الفيل= ولاعب بعد بغياب هدهد سبأ دور