سلام تسليم الوفاء من دون نقص ودون زود=على الرجال اللي يظلل من نصاها ظلها
يانايف الروقي لعلك كل ليله فالوجود=وأنته دليله مانت غاوي والدروب تدلها

يامرحبا ترحيب غالي ياعريبين الجدود=ياربعنا الغالين ياللي دلنا من دلها
انا على وضح النقا والعود في عين الحسود=جاك الخبر واللي عقد روس الحبال ايحلها

عان المخايل والبروق اللي تسابقها الرعود=اللي يشوق(ن) النواظر والكبود تبلها
أخبرك ماتقصر حبالك عن عذيات العدود=لكن ياكثر الأمور اللي صعيب(ن) حلها

الليل توه ماسرى والنار من قدح الزنود=ترى العلوم الطيبه عند النشاما كلها
ياصاحبي حنا نميز في الصوادر والورود=يومن بعض الناس يارجال ما يفطنلها

الليل باقي والدروب لها يابن ملحق حدود=آثرك تبغا الناس ترسلّك ولاترسلّها
ترى الليالي مره وحلوه على شف الكبود=لن مارضيت بمرها وليا رضيت بحلّها

مانيب راع الحجه اللي مالها عندي شهود=الله يبارك في البيوت اللي تعيش ابضلها
المشكله ياصاحبي بين النصارى واليهود=لعلها ما تنتهي من مشكله لعلها