(مات الجمر) لحمد السعيد
 

مات الجمر وقلوب الاحباب حية &&& والموت لا ماتت قلوب الحبايب

ياشيشتي لو فيج ذنب وخطية &&& معاج احس اني عن الناس غايب

العام كانوا لي من الاصحاب مية &&& وقت الرخا لكن جفوا بالنوايب

لاهنت ياقلب ٍ شكى من خويه &&& جم راس من طعنات الاصحاب شايب!!

مرات اقول ان الخبل ياهنيه &&& ولقيتهم يشكون ظلم القرايب

ومرات اقول النذل لارحم حيه &&& واثر النذل في بعض الاوقات صايب

يانفس شيليها على السامرية &&& شيل الطرب ماعاد فيها طلايب

وش لي بتنبيه القلوب العمية &&& وحنا بهالدنيا دروب وركايب

أبتغزل في هذيك البنية &&& بنت ٍ تفل القلب فل الذوايب

جم بعثرتني وجمعتني هنية!! &&& بنفس المكان اللي جمعنا غرايب

ياضعفها معهم وعندي قوية &&& منها غدا ثلثين قلبي خرايب

مرباعها بين العيون الشقية &&& ومقيظها بين الجروح العطايب

ماقول يذبح زينها بس هيّ &&& تلفتلها عود ٍ عن الحب تايب

ولاقول مغرورة ولاهي خلية &&& فيها دلع طفل ٍ تبناه شايب

جمال نجد وفتنة ٍ حايلية &&& وش جمع الثنتين فيها عجايب

اليا قبلت بين حسنات ٍ وسية &&& ياكثر ذنبي بين طيب وغصايب

واليا ادبرت في دمعتين ٍ ندية &&& قلب ٍ معاها وقلب ٍ فالصدر ذايب

راح العمر مابين روحة وجية &&& ياكثر غلطاتي ولاني بهايب

شب الجمر مادام الاشواق حية &&& وطف العتب والعمر ضحك ومصايب

( لسماع القصيدة اضغط هنا )

الله يعطيك العافيه يا المقاطي ..

قصيدة جميله .. مع ان فيها طاري للشيشه .. وهي مضره بالصحه

تحياتي ,,,

لاهنت على ها المشاركة
وصح لسان الشاعر

:) ماختلفنا يابن فرحان بضرر الشيشة وهو قال لو فيج ذنب وخطية
وشكرا على مروركم