يا من إذا منِّه دعا العبد موجود= وما ضاع من يدعيك يا رب وقته
أنت الولي وأنته لنا خير معبود = ومن يوصلك يا رب خلقك وصلته
جانا الخبر عن وقفة الطيب يا سعود = والطيب فيكم يا المريبض خبرته
شيخٍ مع الشيخان له عد مورود = بيده زلال الطيب ياما شربته
سعود بالجودات والمد موعود = ما يذخر المطلوب لامن طلبته
يلقى الضيوف بصافي الهيل والعود = والبشر في طلة محياه شفته
تسري بطيبه والوفاء هبة النود = واسمه يشرف هرجتي لا نطقته
من عهد بوه وجده العز معدود = زيد البليهد قالها ما عرفته
(عند المريبض صكة الباب منقود= أدري بمقصوده وانا ما نشدته)
(والباب ما صكوا مجاريه بالعود = ولا حط له راع المسامير بته)
وأنا على ممضى البليهد لي عدود= أعدها مثل الذهب لا سبكته
ثنتين منها منزل الجود محسود = العرف والطيبه وأنا ما حسدته
باب الحسد عن راعي العرف موصود = وأنا الذي مما عرفته غبطته
عرفت عنه البذل والطيب والجود = ولو بوصفه ما أوفيه مهما وصفته
دايم على داره مزارات ووفود = وفي ندوته طيب التعامل وجدته
يبذل ولا له في مدى بذله حدود = مثل البحر ما تنقصه لا غرفته
حبل التواصل بيننا دوم مشدود = وأنا على مبدأ التواصل وعدته
سيفٍ إذا منك شحذته له حدود = وتعجب يمينك ذروته لا نقلته
بابه عن الضيفان ما هو بمردود = وأفخر بشعري فيه لا من مدحته
أبمدحه وكل ملحوق مطرود = ويبقى الكثير بسيرته ما شرحته