يامرحبا من خاطرٍ دايم وشفه فالثمين = واثر الثمينه ماتحصل غير في دكانها
يالهذلي لك جرّه قديمه ماتغيرها السنين = يوم الفوارس فالمعارك ضايق(ن)ميدانها

دام البقا ياللي ترحب في محل الغانمين = والليله الليله علومك مال بك ميزانها
أنته تبا درب القشر وألا تبا الدرب اليمين = أجمع مكاسب مع خساير والمكاسب عانها

ان كان هذي من طبوع هذيل بين المسلمين!! = ربعي عتيبه دايم الترحيب في ضيفانها
انا ليا مني مشيت الدرب لي عقلٍ وعين = متبوع ماني تابعٍ للي تجر ارسانها

والنعم بعتابه لكن الله على مثلك يعين = يرفع صقور اجو في جو الفضا جنحانها
أعلمك مرة ولا أعيد السوالف مرتين = نفسك بلاها يوم غنت مقتوي شيطانها