يا الله أنا من جود حسناك طالبك =عفوك ومدك حيث ما نتب بخيلي
يا الآدمي دنياك هاذي تعذبك =لو طفت فيها ما لقيت الدليلي
كل على مذهب إيمامه يخاطبك =يبيك من زايد ذنوبه تشيلي
الى عصيت أهل المذاهب تعاتبك =كل يقول أبيك يمي تجي لي
لو انتخيت بعيد بالسو تطلبك =وكل بصاعه من ذنوبه يكيلي
أحد يصحح لك حديثه ويرهبك =واحد يقول الحق عندي نزيلي
واحد يخيفك في كلامه ويدبك =ابليس يضحك له وهو مستشيلي
الناس عوجان المناطق تكذبك =وعن الصحيح الكذب معهم بديلي
إن ما رضيت بقولهم نتف شاربك =وتكبر ذنوبك لو غناتك تهيلي
ناس على درب الفضيلة تحاربك =وعلى دروب الشر تهذل هذيلي
دروبهم عسرات عوج وتتعبك =ما تستوي لك لا ولا تستويلي
ينبيك عن دنياك ماضي تجاربك =وعزي لحالك كان عرفك قليلي
اتبع نبيك واترك اللي مجنبك =واقضب مماشي سنته لا تعيلي
اللي بغار الثور للرشد يندبك =وأبو بكر عنده نديم وخليلي