يابوش كانك مندهش من مجتمعنا كيف صار =ارجع لتاريخ القبايل والسير واخبارها
تلقى بها نبذه عن العتبان خلان المهار =العزوه اللي لاتذل ولاتخون بجارها
يوم الجزيره تصتلي فيما مضى شعله ونار = ايصبحون ام الحوار ولاتشوف حوارها
النا على وجه الجزيره بالسطا رسم وقرار=من فعلنا تجمد هل الاكوار فوق اكوارها
لاصوتوا شيخاننا نقدح مثل قدح الشرار=وشيوخنا تامر وحنا نستمع لاشوارها
نقدم بسطوتنا وهيبتنا ولانخطي العيار =والطلقه اللي من يدينا مايخيب اعيارها
اليا حدرنا مثل سيل ٍ فوق وجه الارض سار =كل الديار اللي يمر بها يعل اقفارها
يالين صبحها معزي وانجلا عنها الغبار =وأمٌن بدايدها وغنا بالسعد نوّارها
قمنا وبايعناه بالطاعه كبار ٍ مع صغار =ووحٌد قبايلها وشيدها وعز اسوارها
واليوم تحت اشعار دولتنا وياحي الشعار=شهادة التوحيد والسيفين رمز شعارها
جنا جيوش آل السعود ان كان عج الحرب ثار= نارد على جال المنايا مانهاب اخطارها
شف جمعنا الحاشد بعد سمحولنا طوال العمار= مدينة ٍ وسط الصحاري تدهشك بأنوارها
كله على شان المزاين للزيان من البكار= البل تحت راية هل العوجا رفعنا كارها
والبيت الابيض مايجي نص الصياوين الكبار=اللي يزود من رحابتها كثر خطارها
يكفيك منٌا موقع ٍ تقول صالات المطار =بيٌن ولايحتاج ناس ٍ تاصفه بأشعارها
صيوان قطمان المحازم جالبين الأفتخار=العزوه اللي رافع ٍ راسي بطيب أذكارها
عليه نوٌ ٍ من يمين ابا العلا تسقي الديار = غيث ٍ على خطارها سم ٍ على اللي بارها
شيخ ٍ ينومسني بذكره كل مادار الحوار= الله يديمه هضبة ٍ نزبن بروس أحجارها