من لا يجمل لابته فالمواقيف = عل الليالي بشرها تلتويبه
لا صار مايرهي لروس المشاريف = مزاحم الشعار ماهوا غصيبه
ان كان هي بالشعر جت لي على الكيف = أنا علاج الشعر وانا طبيبه
وان عودت رسايلٍ بالمضاريف = حزامي هل الوقفات ربعي عتيبه

اللي تعشق الشعر وافصاح الأقلام = ياللي تميز في اللهب والرماده
عندي طلب من حقنا والطلب هام = الطفل لو زود بالأصوات هاده
وحطه على اللي حطمت كل الأرقام = وارفع على صوته شويه زياده
هذي فواصل عدلت ميل الإعلام = أقولها ولا هي بحاجة شهاده
واليا لعنت ابليس وقويت الإلمام = عزز سموعك وأطيب الربع ناده
خله يشوف سكود ويشوف قسام = من راس شاعر شبها من زناده
واليا نظرني قلت قدام قدام = عندي على درب المهالك جلاده
لني لا جبت البيت تخشاه الأخصام = ويشيب منه الطفل داخل مهاده
أصوره تصوير وأبنيه بإحكام = وأصدره جاري لزوم اعتماده
أبيه لا شاركت به يعتبر تام = كامل مكمل ما يجيبه نقاده
وأرسلت هاجوسٍ سرى الليل ما نام = عيا يطيب له الكرى والوساده
وثقت فيه العام واللي ورى العام = و من قبلها يجهد ويكثر جهاده
واليوم مثل الحر في الجو لا حام = يعجبك هده لا نتخيت بهداده
تل السبوق وجاب لي خير الأقسام = جزلٍ طبوعه ما يجيب الزهاده
في ظرف ساعه ما تحريته أيام = وجلست أرتب ما لزمني عداده
في ضيافة اللي لا قسى الوقت طهطام = اللي خذا بروس المعالي رياده
سعد سعد متوج الشعر بوسام = ومقدم لاغلى قصيدة قلاده
أبيض وجه لو قلتها قيلت أكوام = قيد سبقوني وش لنا بالإعاده
لكن حشره الله في دار الأنعام = في جنة الفردوس شربه وزاده
لانه كسى شعر النبط أفخم الخام = وعالج هموم الشعر وانهى حداده
تجمعوا من شرق من غرب من شام = تجمع ما يجني إلا السعاده
مدام يجمعنا معاً دين الإسلام = وننطق بذكر أشرف نبي والشهاده
الدين واحد ما بنا حزب وأقسام = الله خلقنا كلنا للعباده
تزاحموا شعار جزلين جزام = وكلٍ طموحه لو يشرف بلآده
لكن عندي عزم واصرار واهمام = إني على الموقف قوي الإرآده
أشوش من راسي ليا سبوت الأقدام = حضرت في لازم عليه سداده
من داري اللي هب لي حلو الانسام = جعلي فدا حره وفدوة براده
لجله أبيع الروح لا سام سوام = أبيع روحي لو ثمنها الإباده
أعلن ولائي لخادم البيت ضرغام = وقد بايعوا شبابنا والعواده
الله يعز ملوكنا عزهم دام = يا قيادةٍ ماهي بأية قياده
أقساهم اللي يمسح دموع الأيتام = و من شان شعبه ماهتنا في رقاده
كلٍ وله حكام ودروع واحسام = وكلٍ يغني في مليكه إنشاده
لكن ما حكامنا بأي حكام = الأبو سيد وانجب عيال ساده
ما جات له بمحايله وحبة ازمام = إلا بسيفٍ جرده من غماده
و في حكم أبو متعب وقف حظها وقام = ثبت مراسيمه وعزز شداده
هذا وأنا من لابةٍ رمحها سام = الطيب فيهم واخذوا الطيب عاده
ربعي عتيبه قيد للضد واخزام = كم فارسٍ قد فاختوبه جواده
ليا غزوا ما قالوا أوهام أوهام = عدوهم منهم حصيله هجاده
لو كانه أبيض وجه ماضي له أعوام = من بعدهم وجهه يحصل سواده
أهيم في ربعي ولاني بمنلام = من لامني تحرم عليه السعاده
وباقي القبايل نعم طلقين واحشام = وكلٍ بهم يلقى نهاية مراده
و من قبل منهي ما جنيته من إلهام = أكبر شرف أني جنيت بحصاده
الدين واحد ما بنا حزب وأقسام = الله خلقنا كلنا للعباده