ربعي عتابة مثل نوٍ زاف = رعدة وبرقة والخيال يقود
نوي غزير وجايله زفزاف = وسيل الجبال يغطي النفود
في ضل دولة حكمها الإنصاف = والأمر لله ثم لإبن اسعود
عاين علمها جايله رفراف = في كل دولة شامخ وماجود
في ضل أبو متعب رجل ميقاف = زيزومها لن حك عود بعود
ولي عهده درع له وإلحاف = إلحاف لن هبَت هبوب النود
وأخوانه اللي فعلهم ينشاف = الكل منهم درع له واعضود
دون الوطن بالسيف والسياف = تسهر وحنا في الأمان رقود
ألاد مقرن للعدو اصلاف = إليا غلط من حضه المقرود
اللي يعاديهم يجيه اشعاف = يوم احتكاك النار والبارود
ملوكنا واشيوخنا عرَاف = الكل منهم باذل المجهود
أٌذر في عين العدو اصراف = لين اتهطش كنه المرمود
وهذا الوطن متباعد الأطراف = الشعب كله في حماه جنود
واللي يريده عاف مما شاف = شاف العزاير في الليالي السود
واعتابه الهيلا على المشراف = وباقي القبايل ماعلاها زود
تارد على العد الغزير أطواف = والناس تعرف وشه المقصود
وبو رجيله يوم قال القاف = ينقض ويفتل حبله المشدود
مايارد العد بحبال اصخاف = اليا وردنا حاضه المارود
وأنا ثبيتي وأعتزي ما خاف = تاريخ مانبغا علاه اشهود
واللي يجينا بالعلوم اخفاف = مايحسب الناقد من المنقود
والراس ماينزل عن الأكتاف = الا ليا جا يومه الماعود
واخـتامــــــها يـالله يالــطَاف = تلطف بنا ياحي يامعبود
عداد من زار الحرم واطاف = واعداد ماحث السحاب ارعود
على نبي كامـل الأوصــاف = صلوا علاه وسلموا بركود