بتديت القاف بسم الله رب الكون كله=وحده اللي طالبه ربي ورافعله يديه
التجاله عبده اللي داخله مليون عله=من سبب جور الليالي والمشاكل سرمديه
واحد معبود حكمه والشريعه في سجله=كاشف الاسرار ظاهرها بعد واللي خفيه
ثم اثنيها لابو بندر ووصلها محله=غيهبي تملاه من راسه لساسه غايريه
قاصد اللي من شبابه يعقد الحبل ويحله=من رجال نارهم في حزت الميقاف حيه
عاشوا بعز ومعزه والوفا فيهم جبله=فعلهم يذكر على وقت العصور الاوليه
ماتعودت اتكلم فالكلام بدون ادله=الكلام اللي بدون ثبوت ماله قابليه
والله اني ماطرالي غير بدر الضيط لله=جيت احث الرجل صوبه والهبوب مصافقيه
راكب اللي يوم تله ذاكر ربه وتله=حط في راسه كريم اسبال والنيه مطيه
مادخل فالقلب خوف ومادخل فالقلب ذله=سايقه شدت براسه وامسكت عنده حميه
دق سلفه والمراوح يوم دقه جاوبله=كن صوت المروحه شاعر وغنى السامريه
يوم قفى هل شكمانه مثل دمع تهله=عين بنت وردوا معشوقها حوض المنيه
روحت يم ابن تايف كنها والله تدله=ياجماعه نعنبوها عالميه عالميه
لونها كن البحر من لونها محد يمله=والصياح من الكفر كنه مضاريب برديه
وارد الماني شيح واللي في بالي فدوتله=صاح سايقها وقال ابشر وروحي لك هديه
قلت له تكفى دخيلك لا وصلت الشيخ قله=بلغه مني سلام وبلغه مني تحيه
واشرح ظروفي وقله من مذله في مذله=كني اللي ميت بين البشر والناس حيه
صارت هموم الليالي كل سيف لي تسله=صارت الدنيا بعيني كلها ماهي فضيه
نعنبو ضيم الليالي يطرح الرجل ويذله=يضحك الشامت علي وضحكته شر البليه
والوجيه اللي اليا من غبت دايم مسفهله=نعنبوها كيف تدري بس وش لي وش عليه