الشيخي=
سلام ومرحبا والبال صافي والبرا مـردود =
بردّية وفا فيها النفـل والشيـح والكـادي=
من أول يوم نسمع بسم عبدالواحد ابن سعود =
نقف له كلنا واليوم عادي والإسـم عـادي =
عبدالواحد=
هلا مليون ممزوجة بريح المستكا والعود =
بعون الله وباسـم الله ويالله والله البـادي =
أنا موجود واللي يعتبرني ماني بموجود=
يدورني عبث في مملكة عاد بن شـدادي =
الشيخي=
هنا تحذير:لاتفهم غلط باب الغلط مسـدود =
على قول المثل فوق الشفا تسعين نقـادي =
وجودك دون مايلفت نظر مايبلغ المقصود =
واظنك بين ضد وضد ماجمعت الاضدادي=
عبدالواحد=
أنا فاهم غلط ؟ فاهم غلط مير الخطا مردود =
من التسعين نقاد اعتبـر سبعيـن حسـادي =
أنا موجود فعلا لكن العالم هـو المفقـود =
غريب وراس مالي حفنة من تربة بـلادي =
الشيخي=
فداك الأولـة والثانيـة واللـي بعدهـا زود =
مجاديفك تخض الحبر رغم ان البحر هـادي =
ترى مانته محصل في الفضا عالم بدون حدود =
يرغّبك الجبل لكـن يخلـف ظنـك الـوادي =
عبدالواحد=
فداي الافديت اللي يطفي النـار بالبـارود =
ويسكب دم أبوه ويشربه من عنـق بـرادي =
أنا كنت أكبر أخواني وما زلت آخر العنقود=
أدخل جدي أفضل مدرسة وأقوم لأحفـادي =
الشيخي=
كثير الناس تعرف قصة ابراهيم والنمـرود =
ولكن هد من روعك وغير موجـة الـرادي =
عسى الله لايشرهني من اخوانك وابوك العود =
تسببت بوفاتك والسبـب تاريـخ ميـلادي =
عبدالواحد=
سمعت بقصة النمرود لكـن بعـد ناقـة هـود =
ذبحها واحد مطفوق مـا يحسـب لهـا حـادي =
تدور الأرض عكس ويصبح الطارد هو المطرود =
ويسجن حضرة السجـان والصيـاد ينصـادي =