الاوله يالله ياخير معبود=نبدأ بذكرك يارفيع الجلالي
بأمرك يصير من العدم شي موجود=ويصير بأمرك كل موجود بالي
فضلك وصلنا وانت للفضل محمود=امن وامان وخير والرب عالي
والثانيه ربعي لهم عز مشهود=يشهد بعيد الدار واللي موالي
ربعي عتابه فالقاء شر وعضود=ضد المعادي سم في كل حالي
وعلى دروب العز في عزمها اسنود=طيب وفاء والعزم هز الجبالي
برقاء وروق وساس والساس ممدود=ياصل هوازن من قديم الليالي
في ملتقى فيه الوفاء عز والجود=تبقى اصالتنا بحاضر وتالي
ياللي جهلت العلم والعلم مقصود=عتيبه الهيلا بخير ومعالي
اقوولها بالصوت والكل موجود=غااالين يالعتبان من صف غالي
دام اللقاء في الملتقى زاد بوفود=ودام الشعر حاضر وجاله مجالي
ربعي ثبيت الهم على العد مارود=تارد حضاض الموت والموت حالي
ساس القبيله كلها دون منقود=خوال طاه دام عز الخوالي
ولهم مع العربان هبه كما النود=لاصار هبت من جنوب وشمالي
وقت الشدايد مثل براق ورعود=ياصلك زلازاله وبالخير سالي
قومن لهم في ساحه العز مجهود=بالصيت والمعروف مثل الهلالي
والعز للعاني لهم درب وقيود=والضيف اله من بن صفر الدلالي
وصلوا على المختار واعداده الذود=واعداد مر ايامنا والليالي
شفيعنا والقبر منزل وملحود=شفيعنا في يوم فيه الهوالي

ياهجوسي رتبي فالمعاني والحروف=والوصوف الزايفه لايزيد أغبارها
المعاني جبتها والخطاء لاما يطوف=حددي مسافه الرحله ومشوارها
حدني وقت الشقى والمصاعب والظروف=والليالي كشرت نابها وإمرارها
مايجي فصحابها غير شك وغير خوف=والندامة سرها والحسا يف جارها
لوتجي فلبوسها زينها مثل الهنوف=كم تغر من العرب كذبها وأشرارها
من له عقل أيتفكر وله عين أبها يشوف=يعرف إسرار الليالي وجاه إخبارها
حدها مثل الخناجر وتضرب كالسيوف=والمرارة طعمها والغدر فسوارها
أخير ماجاء بها ركعة وتقوى وخوف=من ربنا قسم أحظوظنا واختارها
نسعى لجنه وسعينا فالوقت ملهوف=والربح فالاخره جنات وأنهارها
والرزق ياصلك حتى ولوكنت مكتوف=مكتوب والعين لازم ترى بنضارها
امش بعدالة وحذرا تجي درب ملفوف=تندم وتجزع ونفسك يجي قبارها
فالرزانه زين والشر لاجيت أمخطوف=وبالصراحة تغلب اللي يولع نارها
والامانه صونها لإيجي سر مكشوف=ثم تصبح كسرت اليد من جبارها
وأخر القول ياسامعين البيت مردوف=رادفينه بالمعاني وحسن إشعارها
صلوا على خير مرسل و بالصدق أمعروف=والقلوب المظلمة ردها لنوارها