تو حان القصيد وتو زانت طروقه = يوم صارت عتيبه صف برقا وروقه
ننتظر كلنا محفل عتيبه يجينا = والخيال انحيّن وقت لمعة بروقه
سيّل الله دارك يالنفود العريقه = بعد صرتي مكان المهرجان بحقوقه
وبين قدح السوالف وبين نورٍ نخيله = يالله ابنوّ وسممي هانياتٍ حقوقه
يسقي اديار هيلاً هايله بالوصايف = لين شعبناها تمشي بهون ورفوقه
سيل هاني ولا يجرح بطون المسايل = لجل ينبت نباتٍ باقياتٍ عروقه
لين ما عاد تفرق بين حزم ودماثه = لونها لون واحد نادراتٍ فتوقه
كل نوعٍ تشوفه من جميع المنابت = وان وطيته برجلك انفقع بمعلوقه
تاكل النوق عشبٍ ما تخلطه بغيره = وهبةٍ من كريمٍ يعلم اللي نسوقه
هي درات الحياهْ ان طال عمر البنادم = شفّ راع البداوه وين مرباع نوقه
كل هاذا طرات العمر عند العتيبي = وكل عاقل يعرف المخطيه والصدوقه
ياعتيبه ترانا فدوةٍ للقبيله = من قديم العصور بكل عزمٍ وطوقه
صيت مجد وبطوله زاخرٍ بالفعايل = يم كسب المعالي ما تجيهم معوقه
روق ياروق مع برقا نبا العرض يرقا = لين كلٍ يشوف وبالمسامع يذوقه
ملتقاكم نجاحه بلتحام وتكاتف = أول الغيث قطره ويتدفّق دفوقه
التنافس شريفٍ والتلاحم تبيّن = وكل وصفٍ ثمينٍ بالفعايل تفوقه
تذبح الحايل اللي من علو الحلالي = ونلطم العايل اللي مطلقاتٍ سبوقه
لو اعدد واوصف عاجزاتٍ وصوفي = يقصر الوصف ياصف مجدنا من شروقه
وعقب جانا أمانٍ ما يوصّف بمثله = تحت حكمٍ رشيدٍ وافياتٍ عموقه
يدحر الفتنه اللي سعيها للتفرّق = لين كل القبايل في ذراه امحقوقه
الله الله يحفظه من جميع الصوادف = وكل نفسٍ تضده يا عساها زهوقه
دام حكمٍ ورثته يابو متعب وصنته = وبايعك كل شعبك معلنٍ لك وثوقه
لك نجدد ولانا يا سليل الذيابه = ونتبرأ من اللي دارنا ما يشوقه
حصن عالي مكينٍ دون تربة وطنّا = وانتسابق لصدّه من يفكر يبوقه