يا الله من نو(ن) تكاشف بروقه=من مدلهم ٍ مجهم ٍ تالي الليل
ابدبرة الخالق علينا تسوقه=سوقات رحمه من صدوق المخاييل
بوقت ٍ به المرزم قريب ٍ خفوقه=نص الزمان أقفى ونصه مقابيل
(غرْ السحاب ) اللي غشونه حقوقه=عله على مكيده يهل الهماليل
ملك الكرام اللي خذوا فيه روقه=يوم الليالي اللي بها جاير الميل
ديار الوحيد اللي قصار ٍ سبوقه=حمر ٍ منابعهن قراح ٍ شهاليل
جعل البرد يملا ملازم وسوقه=ويأخذ ثمان أيام ما ياقف السيل
يحيي النبات اللي نواشف عروقه=بنديرة تضفي من الجدي لسهيل
جلت ربيعه حد عرعر ولوقه=ومن الجرير إلى مزارع تخاييل
كل ٍ يرتع به شياهه ونوقه=ويرتاح من عقب الرهق والبهاذيل
تلقى الزبيدي مع خرايم فتوقه=متوفر ٍ بفياضها والهذاليل
وحتى القطا فيها تعاقب فروقه=بين النبات اللي عذوقه مظاليل
وتقنع بها كل النفوس الشفوقه=وتبرا بها حتى الكبود المعاليل
ويأخذ بها الديان باقي حقوقه=من البطول ومن وفيْ الرياجيل
والماء بها يلحق منا هي عموقه=وتاريخها يبقى لجيل ٍ بعد جيل
والمعذره من كل هسه وتوقه=وعن غلطة ٍ بالقاف لمحرف القيل