ياناشدٍ عني من أيات الأبداد =سؤالك اللي قلت يحتاج إجابه
إجابةٍ تشفي معاليل الأكباد =خذها من الواقع دقيق الإصابه
لاسلتني من لابةٍ طيبهم ساد =في نجد مربايه وربعي عتابه
هيلاً على تحقيق الأمجاد وراد =يوم السنين الماضيه بالحرابه
قبيلةٍ بأعدادها هي والأعتاد =وتوحيدها للصف ماتنتجابه
مثل الجبال اللي لها أرواس والهاد =يذري ذراها من حماها لجابه
وان قلت وأنته ماكرك باي الاطواد =من آلاد روق أهل الكرم والصلابه
قومٍ لهم في ذروة المجد مقعاد =تجمع جوانبهم ليان ومهابه
وان قلت روق شعوب خذ مني أوكاد =تفصيل علمٍ ماتقطع عقابه
قبيلتي من فالقسا ترخص الزاد =ليا من وجه الوقت كشر بنابه
عضيان للطولات والمجد رواد =لهاماتهم روم المعالي عصابه
عضيان مدهلهم على وسق الأمجاد =وعزومهم كل الشموخ تهقابه
عضيان فيهم زاكي المدح ينقاد =لاحل طاريهم حضر من غيابه
أول مزاياهم على روس الأشهاد =إكرام ضيف وقو عزم ومهابه
وثاني مزاياهم ثقالن وركاد =مع وسع صدر وزود عرف ورحابه
الهم حضور بحاضر الوقت وابعاد =تاريخ لو فات الدهر ما انطوابه
لوتشهد الصحراء وأثر هوج الأنواد =ويش الزمان من الفعول انتحابه
يوم المراجل فوق عيرات وجياد =ومن لاصمد في وجه ضده غدابه
يقودهم شوخٍ يضدون الأضداد =مروين حد اللي غليظٍ قضابه
سيفٍ من أيمان المطاليق كم صاد =من راس شيخٍ حبل الأقدار جابه
عمهوج ذكره موجده فعله اوجاد =مشهور يوم الدم الأشقر خضابه
وأفعال أهل عمهوج في جيش الأسياد =من غير شيٍ مابدينا حسابه
شوخٍ مراكضهم يجيبن الأذواد =ليا جا لغارتهم عليها انحطابه
بالسيف الابتر وبشغاميم الأولاد =بظهور سردٍ مثل شهب الذيابه
شالح قديم أفعاله الشم ماباد =كم مصدرٍ محفوظةٍ في كتابه
اليا احكم القبضه على السيف ماحاد =ليثٍ مجاويع الضواري تهابه
وعقبه عديمٍ بالمخاليب جلاد =ذيب السرب كم جوٍ اخلا جنابه
نادر نهارٍ للكدر فيه رعاد =بالشور اشار وباع به واشترابه
ومارق لو اذكر سيرته جمع وافراد =مثل سلفه مافي فعوله غرابه
منها ومنها وقعةٍ غربي الواد =فالموقع اللي جمع مارق رسابه
راحت جياد الخيل من فعله ابداد =والخصم من يمنا اخو نوره ذهابه
ويومٍ جنوبي شرقي الرجم وشداد =من هول ماجا فيه كلٍ درابه
شوخِ لمزحم فالمهمات قياد =مثل السباع اللي لهن اقتلابه
ورثٍ من الجدان لاحفاد الأحفاد =ماهيب بدعة وقت والا نهابه
في نجد كم غنابها كل قصاد =وغنوبها شمر سميره وطابه
يمشي وراهم جمع مزحم ليا قاد =بيدينهم حبل الزعامه قضابه
شوخ الشيوخ وروس نبراس وعماد =ورثٍ تولاه الوريث ورقابه
لو جابت الأيام منكر وجحاد =خله على عمياه يشعب ركابه
يابدر لك يم الشواهيق مسناد =مجناك باقي في علاوي هضابه
والاعقيم الراي ماعنه نشاد =يقبل ويقفي مثل طارد سرابه
ان قلت له مسموح من شان الأجواد =وان زل دربه ويش حضرة جنابه
من لا اعترف بالحق يابدر مافاد =أول خطا ضيع سلومه وآدابه
واللي على العيلات سرداد مرداد =هي مهنته شايب وفي أول شبابه
بابٍ يجي من يمهم يوصد اوصاد =خل الثعل يضبح وينعق غرابه
ضو الفتن من سابق الوقت وقاد =ومن ينجرف خلف المساوم غدابه
ودرب الصواب لمنهجك فيه ميعاد =طرقٍ جليه ماعليها رقابه
أفكار عن معمومس الراي شراد =والا الوفي سامي هدفها اعتزابه
والمعرفه ماهيب بعقال وقياد =حره والأفكار العوارف ذرابه
والنقد ماينقدك من غير نقاد =مير ان بدابه علم والا انتهابه
ولو حاولوا قلب المفاهيم حساد =ماهيب فيد اقفايةٍ وانقلابه
ومن يامن آفات الدهر كاش واقصاد =يركض ورا جاثوم حلمٍ سرابه
يابدر خذ من حنكة افكارك ارشاد =من قدح راسك لايجي بالنيابه
أنته حصانٍ كل ماطول الماد =من دون ربعك للنوايب جلابه
وربعك تراهم يابدر حرز وسناد =والهم رجوع العلم عند اكترابه
الله يجمعكم على خير ماراد =وارجي عساها دعوةٍ مستجابه
وماهب نسناسٍ ومادن رعاد =صلوا على المبعوث هو والصحابه

دعانا شيخنا شيخ القبيله=ورانا في لزومه مانجي له
يجي له كل طيب ويتشرف= هو اللى فالحقيقه ينعنى له
كمنه شيخنا منا وفينا= عريب الجد من ساس الفصيله
اليا منه دعى ربعه وجوله= ينال العز باليمنى الطويله
ولاصكو عليه اولاد عاضى =حمول الخيل من روس الدويله
رجال العرف ورجال المروه=لهم وقفات واسلومن جليله
واذا جات المواقف بالتحدى=وكلن قام يقدح من فتيله
على رايك يابو بندر حضرنا=تشرفنا مواقفك النبيله
حضرنا ونت زيزوم الزعامه= زعامه جد ماهي مستحيله
زعامه من بنوها واحتموها=اهل عمهوج مروين الصقيله
هل الجوخ الحمر في وقت دوره=اليا لبسو وعنو كل أصيله
نهارن فيه للطيب شهاده= وفيه اللاش من ضمن الحليله
عوايدهم يفكون المتلى =اليا جاء الهوش في تال الدبيله
واهل قاله واهل بيتن مشيد= يزبن من نصاه ومن يجي له
خذو في قمه المجد الصداره= رفيعين النفوس اعن الرذيله
وانا لو قلت مجروح الشهاده=انا فردن من افراد القبيله
شهد برغش بقوله واعترافه= نهار السيف يطرقهم عويله
اعواء عمهوج في روس الطنايا=اعواء ذيبن على راس الطويله
وشهد هذال أخو هملا ونامي =وزكاهم جمل ناقض جديله
بعد جابوه من بين السرايا= وحذف الروس ماله من يشيله
وبعض أفعالهم تصعب عليه=شرحت الوضع بابياتن قليله
زمانن فاتنا خيره وشره=وربي عاضنا خيراً بديله
تحت ظل الشريعه والسياده=وحكمن جعل ربي مايزيله
طلع صقر الجزيره واستلمها= وعاشقتيه يالعذراء الجميله
وازال الشرك عنها والجهاله=وبان النور والحق ودليله
وعاهدناه عهدن مانبوقه= وغال الروح يرخص في سبيله
وصلى الله على خير البريه=عدد ماهل همال المخيله

ابتدي بسم اللذي جل في عالي سماه = واحد فرد صمد لاشريك ولا مثيل
ماخلقنا الا نعبده ولا نعبد سواه = مؤمنينٍ بالبعث مؤمنينٍ بالرحيل
والبنادم ينتهي لو تطول به الحياه = والبقاء لله سبحانه الحي الجليل
وخاتمتها الموت كلن يبي يلقى جزاه = احد في نارٍ تلظى وحد ظلٍ ظليل
اطلبك ياربي العفو واطلبك النجاه = من عذابك لاتعوذ خليلٍ من خليل
المواقف للرجال الصناديد الدهاه =والشجاعة عز والذل في وجه الذليل
مرحبا في محفل الظيط ياجمعٍ لفاه = الامير اللي له الطيب منهاج ودليل
وارثٍ فعلٍ مؤرخ تحير به الرواه = فزعة المحتاج لاشحت ايدين البخيل
بدر بدر الظيط مزحم على الله ثم علاه = من زحولٍ جالهم فعل في اليوم المهيل
سيفهم عمهوج كم راس منعورن رماه = يوم صوك الخيل والجيش والسيف الصقيل
وربعي العضيان ياويل من صارو عداه = كم شجاعٍ حولوبه مزبنة الدخيل
الجبال الراسية مثل ماترسي السراه = هم حمول الخيل لاجا النهار المستحيل
هم موازين العدالة وهم روس القضاه = مضهرين الحق ومطوعين اللي يعيل
ويا اهل البل كل واحد يجيب اللي وراه = نومسونا ودنا نكسب الفعل الجميل
مثل ابن غازي عسى الله يسدد له خطاه = كاسب النوماس والمجد والخلق النبيل
ونحمد الله يوم صرنا على عز وغناه =في ذرى ال سعود مهما مدحناهم قليل
فضلهم ضافن على الخلق مايلحق مداه = الملوك اللي عن الحق لايمكن تميل
استتب الامن والخير في كل اتجاه = نعمة تذكر وتشكر عساها ماتزيل
والختام اهلن هلا عد مايوضي سناه = في المزون اللي هللها على البيدا هليل
قالها اللي ينظم القاف ويثبت بناه = غاص في بحر الجزالة واخذ منها الجزيل