ياراكب حمرا براسه صطاره =حمرا من العيرات نساع الازوار
حمرا وتقلب عينها كالشراره = ومن العيا فيها زعانيف وصطار
شيب القرا من نابيات الفقارة= وضلوع طفاح من المواخير وقصار
حمرا بها من مقدم الصيد شاره= بقمه غزال ذارها الملح وانذار
حمرا تحير بها وصايف جباره= وابو زويد وصفها فيه يحتار
مابذه الراعي كثير الدواره= ولا ارزمت مابين حرفي وبقار
مصفارها بين العلم والخضاره= الى كساه من اول الوسم مخضار
ومن الشعيب الى الحمر والقراره=الى تساقن الخباري بالامطار
وما حدر الواجدي الى خشم صاره= وان حدرت من خشم عواد ويسار
وترعى فليج الى تواسى نهاره= ونادى منادي النبت من كل الاقفار
وتخالفت بين الحمار وصفاره= وتبدلت عقب المغاليب نوار
لما تشابك طنب جاره لجاره= وتشاركو بالماء عزيبٍ ومخمار
مقياضها هد تراجس بياره = قيظه ربيع ومشربه شط وانهار
منيه يمينه وابو نببطه يساره= لا دارها طمر من الربع تندار
ولها على حمض العبيد انحداره= وبمربطه تاكل قمر عشر مسفار
صليتها والعود باد صفاره=وقد شيف من حمل النخل كل مبدار
ولبستها لبس يشوق افتخاره=من كل دشن ناسجه سر وجهار
متخيره والمال يعرف خياره=والناس تعرف بالفعايل والاذكار
مجهد وكل مجهد بافتكاره= والجهد اطيب من سمينات الاعذار
عندي وكل معجبه نور داره=ولولا الفوايد ماتخالفت الانظار
ناوي عليها للجماعه زياره=بخط كتبته ضامن خمسه اسطار
لامن نور الصبح بين اسفاره=ونور القمر ساقه من الفجر مظهار
ممشاه من بين الخضر والقواره=من ديره محالها تقل مزمار
فوقه صبي قطعه السير كاره= قطاع هيبات الفيافي والاخطار
والدرب مع وادي عنيزه عماره= ولها من السكه مسير ومعبار
وممشاه مع خل البواهل سفاره= ومقيالها في مريخ فيه مشجار
والعصر عند مجربين الخطاره=اهل الثنا اهل المروه هل الكار
ماجمعو مال يبونه تجاره=الا يبون به الثنا مثل ماصار
دار بها المحتاج يعطى وقاره= والضيف يرفع له مقام وتعبار
دار الشيوخ اهل الشرف والاماره= ادنا بالادنا كلهم جبار وكبار
الاد روق وكل ثاره بثاره = ذروه محصن مشبعه برق الاطيار
لاحل بين الحفيفين غاره= وتناقلت شهب القصص والدخن ثار
تورشحو صفر سوات السعاره=ياطن حديد وفوقهن حد واحرار
حريبهم بالكون يطفون ناره=واللي زبنهم زابن ضلع سنجار
سقها لابو سلطان وجه الخياره=زبن الذليل الي هفت به على الدار
مصلط الي ثار الدخن من قراره=الى تخالفت العياز من الازوار
توخذ مشاويره وتسمع اخباره= ويندا الى نشت من الجم الابيار
وزيزوم ربعه في نهار الكراره=ويفك بحيلاته مباهيم الافكار
لاصار للقصدير مثل الصهاره=والشمس ربرب فوقها عج وغبار
يثني خلاف الي يقزي ثباره=ويقلط اعلى هابو قصيرين الاشبار
ويصبر ولو كبرت عليه الخساره=الى امحل الوادي وقلن الاسعار
تشكي معاميله ملايل وجاره=كيف اتعزل ثنوته بن وبهار
تراه للجيران دافي جواره=يصبر بحشمتهم عن المقعد الحار
سلم عليه ونشده عن اخباره= وقل له بليت بسلعه سوقها بار
عند العوارف كسرها وانجباره=وعن الردي لو زهرت مابه اثمار
الجاهل الي مادرى ويش كاره=اسمه بتصريف الزمان ابو مختار
ياشيخ ريقي فيه مثل المراره=والكبد كن بها من الغبن مسمار
كني غريب الدار يذكر دياره=جارت عليه ام الكباير بالامصار
والا كما اللي طايح بالمعاره=حالت عليه الخيل واوشو به النار
واقفو وباقي حياته قطاره=وتدالته شهب الحنادي بالاظفار
لانيب ملاك يحسب عقاره= ولا تاجر يصرف بليره ودينار
ومع النقا لانيب راعي عباره=اكذب واقابل مثل ماقيل قمار
واللي رفيق لي بدا به غياره=اشرف وشاف وبدل العرف بانكار
وتبدلت عقب البشاره نذاره=وذل الغراب وحط غيره بالاوكار
ياشيخ انا بنشدك نشده مشاره=غديت مثل مولع النار بالغار
لاودرت عني طيور الصقاره= وش عاد ابا اقنص به ليا صرت صقار
قلته وانا حظي ردي العباره= وابا اتلزى في زماني ولو جار
ولو انها بالمرجله والجساره= صبرت ولا بعت عمري عن العار

ماحدرت جده لنجد لصمان=ثابت الى زعزع جميع اعتزوا به
ماقال ذا روقي وهذا ابن شيبان=يضفي على عوراتهم ردن ثوبه
مقدم عتيبه تتبعه سر وعلان=هيلا تهايل غالبه ومغلوبه
شيخ الى من العدو بالردى بان=نبب على الهيلا جميع وبدوا به