|
موضـوع مـهـم (جـداً جـداً جـداً) للـغـايــه
بسـم اللـه الرحـمـن الـرحيــم أولاً : أحـب أهنيكم بقدوم شهر رمضان المبارك اعاده الله علينا وعليكم باليمن والبركات ثانيـاً : انا حـاب أتـكـلم عن موضوع مهم وشائك ولازم الكل يكون واعي وفاهم لهذا الموضوع ويعرف مدى ابعاده من مصلحة للقبيله وافراد القبيله وسمعتها انا حـاب أتـكـلم عن هاللي يصير من هرج ومرج وكلام اخوي وابن عمي عضو منتدب في موضوعه اللي حطه هنا في المنتدى كلام ميه بالميه صحيح وهو عين العقل وعين الصواب لكن انا حبيت ان أفـّرد موضوع خاص ويتم تثبيته من قبل الاداره وبالاخص اخوي العزيز واللي فعلاً هاب ريح وجهده ملحوظ والكل يشكره عليه وهو ابن عمي غازي البقعاوي فعلا كلامك صحيح يا عضو منتدب .. ( كل من دق له طـنـب قام يعزم ويقول تعالو عندي فعاليات وامسيات ) مايدري ان هذا خطأ ياجماعه لأن المخيم الرسمي للمهرجان راح يكون فيه يومياً فعاليات من عقب صلاة المغرب من ندوات دينيه وندوات ثقافيه وامسيات شعريه ومحاورات الى الفجر .. يعني طول فترة الملتقى راح يكون المخيم الرسمي شغال من عقب صلاة المغرب الى الفجر . . وشلون يجي ذا ابو مخيم وعزيمه ويحط فعاليات واحتفالات ويحوس البرنامج العام للمخيم الرسمي امـير الفخذ اللي يحط مخيم ويفتحه على مدار الساعه هذا بيض الله وجهه وفعله غانم يجمع ربعه ويقوم فيهم ويصير لهم مثل المضافه يريحون عنده ويكون لهم مثل البيت .. واذا عنده مناسبه ويبي يعزم له احد ..... عنده وقت الغدا يغدي فيه يومياً أما وقت الملتقى الرسمي المفروض هو اول شخص يكون في المخيم الرسمي ويحضر فعالياته من البدايه .. والا اذا خلينا الدعوه سايبه كلن بيحط له مخيم ويعزم فيه شعار ويسوي فيه فعاليات وبعدين هي ترى ماهي صعبه كلها ميتين الف ريال ويجون شركه مختصه يحطون له المخيم ويحطون له خمسين راس من الغنم وعشر قعدان ويتكفلون في العشيات والغديات والقهوه والسيرفس على اكمل وجه بس بميتين الف ريال ... ماهي بالصعوبه وكلن يحطه لكن القصد ان يكون اجتماعنا واحد ولا طلع التصوير في شاشات التلفزيون الناس يشوفونا مجتمعين وبكثره وان كان قصدكم عى المكان مايشيل الا يشيل ونص الدعوه بر وخلا يشيل ملاين الملايين وراح يكون شاشات عرض ضخمه اللي مايلقا مكان داخل يقدر يتابع من شاشات العرض اما هرج ومرج كل واحد عنده حفله وامسيه وقسم في مخيم الفلاني وقسم في مخيم الفلاينه .. خلاص بلاش مزاين عتيبه وكلن يحط له مزاين على اسم فخذه .. حنا بنجي من مسافات بعيده نبي نـتـنعـنـا ونحضر من اجل التجمع والفرحه باجتماع القبيله والقصد ترا جمعة القبيله وتلاحمها ماهو مزاين ابل ومنافسه .. وانا ترا متخوف من سالفة المنافسه حنا نشوف ونسمع من ضعاف الانفس او بالأحرى الرخوم او اشباه الرجال الي يسون تفرقه وحزازيه بين القبيله ويجيك اما في مسجات في التلفزيون والا في المجالس ويقول الفوز للفخذ الفلاني والبل والله مع الفلاينه واللي قام في المزاين فلان بن فلان ويشبها بين المراهقين وضعاف الانفس هذا شي خطير ياجماعه ولابد ان يعي كل شخص ان المزاين لعتيبه ان نجح نجح لعتيبه وان فشل فشل لعتيبه ما فيه احد له فضل على المزاين لأن اللي تكلم في المزاين لولا ابناء عتيبه ورجالاتها ماقام المزاين ياليت الكل يكونون على قد المسؤوليه ويكبون العنصريه والحزازيات اللي ماوراها الا التفرقه والنعرات وتعود علينا بسواد الوجه وأخيراً هذي رساله لأصحاب المخيمات من شيوخ ومن رجال الاعمال وافراد القبيله .. اللي بيحط مخيم يحط وحنا نعين ونعاون لكن لايسوي فيه فعاليات واحتفالات تعاكس برنامج المخيم الرئيسي لأي سبب من الأسباب ان شاءالله جايه من ما يكون لايحوس دعوانا .. واذا عنده مناسبه ولازم انه يسوي عزيمه عامه ياخي يسويها غدا واتوقع وقت الظهر مافيه فعاليات للمخيم الرئيسي .. ويخلي الهدف الرئيسي من المخيم هو جمع ربعه اللي جايين من بعيد يريحون عنده ويرقدون عنده ويقوم فيهم على أكمل وجه لكن مايعاكس برنامج المخيم الرئيسي وياليت من أخوي غازي البقعاوي الرجل الشهم والمتميز في هذا المنتدى ان يقوم بتـثـبيت هذا الموضوع لما لـه أهميـّه ورساله توعويه ويجب ان كل شخص يدخل المنتدى ان يطلع عليها ويكون واعي من ناحية المخيمات وسلبياتها وايجابياتها ومن ايضاً من ناحية الحزازيات والعنصريه والمنافسه العمياء على الابل .. لأن الهدف الرئيسي هو الاجتماع بما يرضي الله ورسوله والتلاحم والتآخي والتحاب والا الفوز .. الفوز يا أخوان بالآخره ماهو في حيوانات .. أرجو منك ياغازي وأنـت واعضاء وادارة المنتدى ان تقومون بتوصيل هذه النقاط و ابلاغ اللجنه العليا عن هذه الامور لو بس من باب التذكير والتأكيـد ... ويكون في الندوات المقامه في المهرجان رساله توعويه للكل انه لايوجد منافسه ابداً والكل فايز والقصد جمعة القبيله والتلاحم والتآخي من أجل رفعة كلمة اشهد ان لا اله الا الله وان محمداً عبده ورسوله وآسف جدا جدا على الاطاله ولكن حبي لقبيلتي والخوف على سمعتها والسمو بها الى المعالي والسعي لإنجاح هذا الملتقى الكبير واظهاره في اروع صوره هو الذي دفعني لكتابة هذا الموضوع .. لأن المهرجان يخصنا جميعاً ولابد ان الجميع يتعاون وكلن في ما قدره الله على فعله وابسط صوره من صور التعاون هنا في هذا المنتدى وكتابة مواضيع تزيد من الترابط والتلاحم وأخيـراً : أرجـو من اي شخص يريد ان يعقب على الموضوع ان يقراه بأكمله وبـ تمـعـن ويعرف ابعاده واهدافه وشاكر لكم وأسـأل الله العلي العظيم ان يوفقنا لما يحبه ويرضاه والـسـلام خـتـام أخوكم / راعي البرصا الدعـجـاني |
اشكرك ياراع البرصا على هذه الحميه المتوهجه وهذا الحماس والخوف على قبيلتك
بس انا اعتقد ان اللجان يقومون بالتنسيق مع اصحاب تلك المخيمات لتلافي اي تعارض بالبرامج الرسميه للمهرجان . لكن في الغالب تلك المخيمات هي مضيف او مضافه ودورها للكرم اساسا واستيعاب الحشود القادمه من ضيوف ومسايير للراحة والنوم ، وابشر يابن العم موضوعك ابي اطقه بمسامير على شاشة الهيلاء |
شاكر لك مرورك اللي شرفني ياابن عمي غازي وبيض الله وجهك وتسلم على هذي اللمسات الرائعه على
الموضوع انت فعلاً شعله من النشاط وانت الشخص المناسب في المكان المناسب والله يكثر بني عمنا اللي امثالك واللي هم فخر لنا يعطيك الف عافيه وياليت الكل يشارك في هالموضوع ونشد من ازر بعضنا ونوصل هذا الكلام للجنه القائمه على الملتقى وخصوصاً في نقطة التنافس وان القصد جمعة القبيله والتعارف في ما بيننا لك كل تقديري واحترامي اخي وابن عمي غازي البقعاوي أخوك / راعي البرصا |
مشكور يا راعي البرصا
وموضوع جميل جدا [ولاهنت] |
كل الشكر والتقدير والأحترام
يــا راعي البرصا تكلمت فأحكمت بيض الله وجهك وهذا ليس بمستغرب عليك فأنت أبن القبيلة وغيور عليها وتحب لها كل خير وكل ماهو في صالحها كل التقدير والأحترام لك ودمت بود وعاافيه |
بيض الله وجهك ياراعي البرصا
فعلا هذا الكلام الصحيح وماقصرت موضوع اتمنى ان يقراءه جميع شيوخ قبائل عتيبه لما فيه من اهميه تحياتي |
كلامك صحيح وعين العقل ياراع البرصا
اشكرك على مجهودك الطيب يالغالي |
...
. نعم نحن بحاجه ماسه لمثل هذه المواضيع المفيده لافض فوك يالدعجاني عز الله انك تكلمت بمشاعرنا جميعاً... المخيمات القبليه الخاصه هدفها التخفيف من العبئ على المخيم الرسمي في الاوقات التي تحتاج الى ذلك .... اما اثناء اقامة برامج الملتقى فينبغي على الجميع التوجه للمقر الرسمي وان لاتقام الامسيات والمحاورات والبرامج الثقافيه والدينيه الا هناك .... وحسب المعلومات التي لدي ان المخيمات الخاصه لها ضوابط وشروط منها: عدم اقامة اي نشاط فيها مثل اقامة الامسيات والمحاورات ... من مايصرف البعض عن الهدف الرئيسي و هو ... اجتماع ابناء القبيله في مكان واحد يحكي تالفهم وتكاتفهم . |
بيض الله وجهك ياراعي البرصا وكلامك هذا هو كلام أغلب
من قابلتهم من أبناء العم وأنشاءالله مانشوف الا اللي يبيض الوجه ويرفع الراس،،،،،، |
|
| الساعة الآن »08:05 PM. |
Arabization
iraq chooses life
Powered by
vBulletin®
Version 3.8.2
.Copyright ©2000 - 2024, Jelsoft Enterprises Ltd