اشتقتلك وجيت أتصل هم هونت = دامك بقلبي وش يفيد أتصالي
ماودي أشغل وقتك بقول كيف أنت = أو تزعجك رنات صوت أتصالي
لاتحسب أني في غلاتك تهاونت = والا أنت في قلبي ودايم في بالي

لوكنت غالي مثل ما تذكر وقلت = كنت تتصل تنشد عن أحوال حالي
لكن قيمتها تردك وهونت = مستكثراً تدفع علينا ريالي
متغيراً طبعك علينا وتكبرت = وش بدلك قلي عن أول وتالي ؟
فيك البخل بين حقيقه وبينت = عادات من عنده رصيدٍ ومالي

يا صاحبي لبيك يومك تمثلت = باجمل بيوتٍ فالمعاني جزالي
حي الرسايل جملتني وتجملت = أرسلتها ودي يحسك سؤالي
مير أنت لاكلمت تسأل ولارسلت = خايف أقول أني بسير لحالي
أرسلت أحاسبك بالمراجل تبدلت = وأثرك على خبري هجير الدلالي

عديت في رجمٍ طويلاً ولازلت = أرقا مشاريفه ولو كان عالي
وشبيت نار ما تنطفي فيه واشعلت = عادات أبوي وجدي وعمي وخالي
وأنشد أرجالاً يارفيقي ولاهنت = لا قالوا (صفيان) تعرفه أرجالي
وأنت شربت دلالنا يوم سيرت = ولا عرفنا لك مجالس دلالي
مافيك من عتيبه كرمها وتجملت = طبعك من اطباع الشباب التوالي
قهوة على الماشي (معسل) معه (كنت) = وعشاك من مطعم دجاج التلالي
العلم جاك يا من علي تدعي انت = ومن يشعل الفتنه يجي فوق صالي

يا صاحبي يا مرحبا يالغلا دمت = يابن الكرام اللي عزيزاً وغالي
نعمٍ بربعك دام فيهم تحزمت = تشهد لهم الأجواد طيب الخصالي
وألا أنت منهم يا لشلي ماتعلمت = ودوم الرجال تشوف فيها توالي
ذقنا قهوتك يوم فيها تقدمت = دلة حنيف مابها هيل خالي
وأحنا إلى منا عزمناك تممت = نعطيك قدرك يوم لك قدر عالي
ياللعجب ليت الفحل لازم الصمت = ما كان جاه من المعاني حثالي

ابختصر قولي على قول ما قلت = خير الكلام معنى جزيل المقالي
أن كان فينا تالياً مثل ماقلت = يسوى توالينا بربعك رجالي