يا الله يالمعبود يا موجود يا منش الخيالي =يا عظيم همنا مرضاته بكل الوسايل
يا غفور ويا رحيم ويا عليم بالحوالي =يا سميع ويا بصير ويا مجيب لكل سائل
نسألك تقبل دعانا يا مجيب للسؤالي =تنعم بعفوك على اللي مات يا راع الفضايل
يا الله ارحم (ناصر) وظله بظلك يالظلالي =واغفر ذنوبه نهار الحشر في وقت الهوايل
واسكنه في جنة الفردوس يا رب الجلالي =فوقه ظلال النعيم وتحته ورود الخمايل
واجبر مصيبة هل الحردا كريمين السبالي =في وفاة اللي وصوفه غير وامثاله قلايل
الفقيد اللي كسب والنعم من طيب الفعالي =من صغر سنه وهو للطيب في وجهه دلايل
البقا ببوه واخوانه وفي روس العيالي =المحايا أهل الشداد وصفوة رجال الحمايل
يا هل الحردا نعزيكم بزيزوم الرجالي =والعزاء موصول للعتبان ولكل القبايل
والوطن شرقه وغربه والجنوب مع الشمالي =خص به حايل واميره ثم فوجه واهل حايل
يا لمحايا همنا من همكم فاول وتالي =فالرخا واللين ولا فالقسا وقت الصمايل
من وفاة الشيخ (ناصر) همنا ثقل الجبالي =والله أن كبودنا فيها مثل حام الملايل
الحزن رصيدنا والصبر معنا راس مالي =ما يعزينا الشعر بعده ولا بدع المثايل
مير هذي سنة الدنيا ومضمون المقالي =والله أن الموت حق وكل ما فالكون زايل