يالله ياللي تعلم السر والغيب=يارب يامعبود ياذا الجلالة
انك تبعدني عن الشك والريب=وانك تجملني بعلم الجمالة
رتبت لي قافٍ من الفكر ترتيب=قافٍ ينومس من تهيض وقاله
ماقصدي النمة وشذب العراقيب=استغفر الله عن كلام الجهالة
النا مواجيب وعلينا مواجيب=والرجل طيبه في الدهر راس ماله
من عقب من حسان جتنا المكاتيب=وعبداللطيف اللي عسى الخير فاله
وجمال صاحب من خيار الأصاحيب=ربع ٍ نشامى كسبهم كل طالة
رحنا جماعة كلنا ذيب من ذيب=وزميلنا لو هو بعيد نعنا له
لأجل الزمالة نتعب الرجل تتعيب=وهذي تراها ابسط حقوق الزمالة
جينا وحصلنا كثير التراحيب=والمجلس اللي ماتوني دلاله
والكيف عقبه بيننا يمشي الطيب=وكلٍ من اللي صار مسرور باله
وعقب العشاء نادو عليه المعازيب=مشيت له والناس كلٍ مشى له
وصار الذي مااحدٍ حسب له محاسيب=على العشاء ماتكفي الناس صالة
ونشدت لي رجلٍ غزا دقنه الشيب=وياليتني دورت واحد بداله
يقول الي ماعاد في الوضع تجنيب=كلٍ يدبر يارياجيل حاله
وانا ماريد اصعب الوضع تصعيب=يسدني في حفل ربعي بيالة
لكن في الحفلة عواني واجانيب=والاجنبي لازم يوصل رسالة
ابغى بني عمي بروس المراقيب=ماارضى عليهم يشهد الرب عالة
ولا اقول فيه انسان سالم من العيب=والرجل يبذل حيلته واحتياله
وعداد ماتبدي لنا الشمس وتغيب=صلوا على محمد وصحبه وآله