في لمة الناس وأنا أعيش وحداني=والصادره من بنات الفكر اضويها
خرجت من جوهم في جوي الثاني=وذي عادةً ماتخليني واخليها
مضت سنين العمر احلام واماني=وعلى أني اقدر احقق بعض أمانيها
حضي على سكة العثرات يحداني= لو ماتجيني على دربي يناديها
تهذيب نفسي عن اكثر شئ ينهاني =وأنا على الذل والهيبه ماضريها
والي تعلمته أن ترتيبي الثاني =والأوله حقتي ولأني براعيها
الصوت من غفوة التفكير صحاني=والحال في حالها جاء من يواسيها
من بعد فيصل حفيد العود ناداني=معاد حاضر أموري مثل ماضيها
الله جعل نجدتي من قلبه الحاني=والله جعل فزعته تحمد تواليها
ماهو مجرد أمير أمير ونساني =يالعنبو أمارةٍ ما ميزته فيها
ما قول في حضي المقبور عزاني =اقول رجع مياهي في مجاريها
يا فيصل آمر يا ولد أحمد وتلقاني=اطوع النفس بأمرك حيث تبغيها
وأملا عليه كلامٍ ما تعداني =وانا كتبته على نفسي لقاريها
قال أنت شاعر ولك عندي قدر ثاني =وأبيات شعرك تشرفنا قوافيها
ياكثر ماقال في حقي ومطر آني =ومدحه لشعري شهاده وافتخر فيها
ومن بعد ما اثنا علي وصحح ألساني =حملني أرسالةٍ هاذي معانيها
سلم على إخوانك الشعار وخواني =ومن مثل المملكة خارج أراضيها
هم مفخره للبلد فالشعر من داني=وهم خير من مثل الدوله وأهاليها
وهذا الوطن عادته من بين الأوطاني =يصنع رجالاً تشرفنا مباديها
ذي كلمتي حطها في كف ميزاني =والكف الأخر لبايعها وشاريها
هذا رقم هاتفي واسمي وعنواني =واللّي تجي حاجته يآمر وأنا أقضيها
الله يجازيك يافيصل بالأحساني =لفتتك في حقها محدًٍٍ يوفيها
لكنك أنته ولد أحمد كحيلاني =ولاهي غريبه على مثلك يسويها

الهاتف اللّي ما يقدرك راعيه= اشطب على اسمه في الدليل من أساسه
بالذات لا كلمت عجلان تبغيه=وجمد بدون أسباب من قو باسه
أحذف برقمه لابو رقمه ولا أبيه = ان كان هذا المرجله في قياسه
اللّي يبيعك لاتعود وتشريه=حرج على بيعه بسوق النخاسه
وان شفت ولد اللاش كبرت علابيه=ولبس ثياباً ما تجي في مقاسه
خل القدم يمشي ولاتلتفت فيه = وان اعترض لك حط فوقه مداسه
الصاحب اللي ما ينومسك طاريه =خله عسى باقي حياته تعاسه
دور وتلقى لك خويٍ تخاويه = اليا عمس بالك يطير عماسه
واليا نصيته بأمرك الصعب يقضيه =واليا نخيته ينفجر من حماسه
صديقك اللي في المواقف تلاقيه =وعدوك اللي فزعته في حساسه
وان جابته كلمة الاخرى توديه=واليا لقى له درب يحطبك فاسه
يا وسع صدر الوقت على بلاويه=وأهل القلوب اللي تحب النجاسه
بعض الأوادم جعل ربي يشافيه =يحسب طعونه في المقفي فراسه
هذا يشبه حي وهذا يذكيه =وهذا يصبه صب في ربع كاسه
محدٍ بحاله من كلامه مخليه =يلقى على نقل العلوم الوناسه
يبني على أرضٍ الكبر عالي مبانيه=واليا احترك مبناه ينهد ساسه
يا وسع صدر الوقت على بلاويه=يا طول صبري من عنا بعض ناسه

ماني برقاوي وخالي ولد روق=اما كتبتك في حروفي كتابه
وغنيت بك شعري على كل طاروق=واصبحت لغزاً بين ربعي عتابه
يابعد من ذابت عروقه من الشوق=وهمٍ سكن جوفه وهمٍ سرابه
هونك على قلبٍ من الود محروق=يكفيه همه في الزمان وعذابه
لك صاحبٍ طبع الوفا فيه مخلوق=ما مر يومٍ باع به وشترابه
من لا عشق مثلك من البيض معشوق=ماله ومال أهل الهوى والصبابه
ومن دون وصفك ماله الشعر من ذوق=كنه سؤالٍ حائرٍ دون أجابه
للشمس في وجهك ليا غابت شروق=لو نور وجهك مال نوره تشابه
وله واجبٍ عندي والي عنده حقوق=ثلجٍ وراء جمراً دفاءه اصتلابه
يسعد مساء عنقٍ عن المتن منتتوق=بعد انتثر ليل الشعر وكتسابه
ولا ثمر تينٍ طلع ماله عذوق=ماعوشبت أرضه ولا امطر سحابه
ومعزلٍ نابي عن الخصر مفهوق=مايفضحه غير الستر من ثيابه
كنه مطر غيمٍ بلا رعد وبروق=في مشيته في وقفته في أنقلابه
ساقه حمامه لو مواريه غرنوق=وكفه مفاتيح الجمال بخضابه
ومرٍ يغيبي ومراتٍ افوق=إليا انعزف صوتٍ شجين ربابه
أبشر وتأمرني ولبيك منطوق=ولو مايكلمني يرحب حجابه
سلب نظر عيني وأنا نظرتي فوق=وهذا الذي عمق بقلبي صوابه
صعبه تخيطني وأنا كلي فتوق=الله يسامح من رمني حرابه
ولو منزله غادي بعيداً عن السوق=ولامربه دربي ولاقد مشابه
تحداني اقدامي كماء حادي النوق=حتى توقفني على اطراف بابه
والي خلق نفسٍ على شوفه توق=أنه وحيدٍ في غلاه وجنابه

الله على عبقريـه فكـر الانسانـي=صمم لنا الجيب نسج مـن مخيلتـه
موديل هذي السنـه تصنيـع يابانـي=مـاودك الا توقـع بـه ليـا سقتـه
على مزاج بدوي من راس نصراني=مربوط من تحـت حجانـه كرفتـه
انا شريته نظر في شوف الأعياني=عجز لاآرواه في عيني اليا شفته
سلم مفاتحيه محمـد علـى شانـي=وانا على شـان مشـواري تسلمتـه
ومحمد حزام ظهري واوسط أخواني=ليا بدا لازمٍ صعبٍ تغانمته
الجيب VXR والسواق شيباني =من طنخة فيه مالعالم مكيفته
على خطا الخير خاويته وخاواني =لاحان وقت السفر في الحال كلمته
جاني على خوتي شفقن وعجلانـي=وانا بنفس الشعور الـذرب دونتـه
ماهيب خـوة يـا لدانـه يالادانـي=ولاتسمـع الا مسجلهـم ودندنـتـه
يا ثامر بـن فـلاح العـود وصانـي=على اختيار الزميل ان كان زاملتـه
خل الخبر خلفنا وبقيق عنواني =ومدهال فيها عشانا لاتما كنته
حلة زحول الرجال شيوخ قحطانـي=فعولهـم صفحـة التاريـخ سجلتـه
وسلوم قحطان ما بـدل بهـا ثانـي=يكفيك تررحيبة الرجـال وزهمتـه
ترحيبة عادتهـا مـن ورث جدانـي=ماهيـب دل جـديـد ولا تعلمـتـه
قحطان ساس العرب ذربين الأيماني=كم ساعة الحرب من فنجال شاربته
من لا عرف مجدهم مع مر الازماني=لا يزعج النـاس بجوبتـه وباسئلتـه
لو كان في مدحهم مخلص ومتفاني =ابطيت والمدح في قحطان ما كملته
أخذت منهم صديقٍ لي وكفاني =عن كل من قال صادقني وصادقته
يا ربما من أخٍ لك غير الأخواني =ما جابه أبوك وأمك ما تحملته
وأخوي ناصر أبو محمد كحيلاني =فزعات قحطان في نفسه مواطنته
في سيرته حيث ما وجهة تلقاني =اطرز حروف مدحي من معاملته

قفل حسـاب المحفظـه بعـد صفيـت=معاد لي فـي سـوق الأسهـم تجـاره
ياليتنـي فــي سوقـهـا ماتعنـيـت=ما أخذت منهـا إلا الفلـس والخسـاره
أمسيـت فيهـا مغتنـي ليلـة أمسيـت=واصبحت ضيف الفقـر نـازل بـداره
وش عـاد ياسـوق الهواميرخلـيـت=مـن لؤلـؤ البـحـار ولا مـحـاره
كنـت اتحلـم اغتنـي وابتنـي بيـت=والجيب ياقـف فـي كـراج العمـاره
واسلـف المحتـاج حسـب الثوابيـت=وافزع لابن عمـي وضيفـه وجـاره
وفجأه على الواقع مـن الحلـم فزيـت=الله ولا حـلـمٍٍ كـوانــي بـنــاره
( من كثر مامن بعض الأحلام عانيـت=حتى اتصال الهاتـف بـلا حـراره)
بالله عليكـم ياهـل الجـاه والصيـت=أحـدٍ تجـرع مثـل هـذا الـمـراره
مرة سنـه مـا فـي الليالـي تهنيـت=مـره يميـن الـدرب ومـره يسـاره
في الليـل اسامـر منتديـات وصيـت=والسوق من بـدري اتحـرى اخبـاره
أقرا البلونجر كل ما اصبحت وأمسيـت=واتبـع الشـارات شــاره بـشـاره
مافيه عصر مـع الجماعـه تقهويـت=ولا فيـه يـومٍ نمـت بـأول نـهـاره
(ولا عـاد عنـدي للمواعيـد توقيـت=إلا صـلاة الفـرض والإستـخـاره)
وعلى اجتهادي وكثر ما اقبلت واقفيـت=عيـت تفيـد المعـرفـه والشـطـاره
( واصبحت من كثر الضغوطات كبريت=من يـوم تشخطبـه يولـع شـراره )
احيان يضرب هـا المؤشـر دناميـت=ويصفـق بالأحمـر ويتبـدل مسـاره
ولاعادتسمع غير وش بعـت وابقيـت=والنـاس واجـد يقطعـون الإشــاره
ياطـول ساعـات الحـزن والتناهيـت=وياقصر ساعـات الفـرح والبشـاره
رحنا ضحايا الحرب بيـن الطواغيـت=كـلٍ علـى الثانـي يسنـد بـغـاره
والسوق كلـه اصبـح بكـف عفريـت=الله يدمـر مـن سعـى فـي دمــاره

الغضى جمره سراجي والجليس الشاذليه=واتونس وحشتي ومسي على حالي لحالي
مايراودني سرور ولا الفـرح يطـري عليـه=وحالتي هاذي لها شهريـن وأيامٍ حوالي
وليلة البارح تبدل كل حالٍ كـان فيـه=ليلة البارح صراحه غير عـن بـاق الليالـي
ليلةٍ ماهـي كما بـاق الليال السرمديه=والله أعلم في الليال السرمديه وش جرالي
ليلةٍ فيها الفرح بالعيـد مـن عصـر وعشيـه=وتوج الله فرحة الفرحان في مبـدى الهلالي
فرحتي بك ما ترجمهـا الحـروف الأبجديـه=ياغنيـمـة ماكسبـتـه يابقـيـة مابقـالـي
أنتـه أجمل دعـوةٍ مقبولـةٍ مـن والـديـه=وأنته أول من رميت إله الشماغ مـع العقالي
يالحـدود الفاصله مابيـن حسنـاتٍ وسيـه=الله ا نه يدخلك في اخر حـدودٍ مـن حلالـي
وخسارة وقتي الي ضاع فـي روحـه وجيـه=قبل حضي مايجود وقبـل جـوك ماصفالي
مابقـي لزيـن فـي خلـي محـل ولابقـيـه=والله انـه واقـعٍ مـا كنـه إلا مـن خيالي
ماتباع وتنشرى ما تنعطـى هـدي وعطيـه=كلمتيـنٍ قلتهـا زادة غلاتـك وأنـت غالي
قلت لي عذرك جميل وحضرة الغائـب هديـه=ياعطيـة ربنـا يامكسبـي يـاراس مـالي
سرع ماقفت مزونك يـا الهتـون الموسميه=بعد ما ارويتي عطاش الأرض من وبل الخيالي
صرخةٍ دويتها بعد العصـر و الشمس حيـه=وعذابـي ومتاهـة خطوتـي وبـري حالي
قلتهاوأنتـه تلـوح لـي ولـوح لـك بـديـه=يا مسافر عن وطنـا شرقـي الحـد الشمالي
أنت من روحي وفيها وانـت مناك وهنيـه=وفي وطنا لك عمام وفي وطنك النـا خوالي
ياسقى الله ساكن اليرموك وأهل السالميه=ديرة أهل المعرفه والطيب وقروم الرجالي