سر ياقلم والصدر يمليك مالاق = نوادر تجلي عن الخاطر الضيق
إنجاب فكر ٍ جاب مالاق الأذواق = لياهام حلق في سما الشعر تحليق
ماجت له الفكرة على بيض الأوراق =ولا قام يستعرض عليها الطواريق
واللي خذن من رونق الشعر روناق = بنات فكري فوق بيض اللواهيق
عقد ٍ جمع در ٍ لمع فوق الأرناق = تغار منه نجوم ظلما الحناديق
من فيض فكري والضماير والأعماق = يشوق ترنيمه هل الشعر تشويق
ويشوقني وأسوق من ضيقي شياق = تصريف هم مال كونه تفاريق
مير أدن لي ياسعود مايجل الأغلاق = هات الدلال وروق الكيف ترويق
ياسعود عد مهيلٍ يبر الأضياق = تراي أعي مع خنة الهيل وأفيق
يشيخ في راسي زعانيف وحماق = لا شفتهن فوق المناره مدانيق
والنار تومي ضاحها ضاح لهاق = عقب أدبحن يم المغيب المشاريق
كن الهوى لأقرى على النار سراق = لا قام ياخذ مع طرفها تساريق
ونجر ٍ تهيض له المشاعر والأشواق = ياسعود ياخذ بي ضبيحه غداريق
لأدوى بثلث ٍ فآخر الليل غساق = ينعش ضميري نعشة العرق للسيق
وأنا هواي اللي لهن خاطري شاق = رسلانتين ٍ من طوال المعانيق
لازل شقراً للمطاليق معشاق = ملموسة ٍ بالنار من دون تحريق
منها خنين الهيل لاخن عباق = فالراس يفتح للطواري فناتيق
وإن سيق فنجاله على الكيف ينساق = مافيه لاخله ولافيه تبريق
هذا وأنا اللي للشواهيق عشاق = والرجع نجع البدو والوقت ماشيق
أقولها مانيب لا قلت فهاق = لاشك يبغا المجد حظ وتوافيق
في نجد مايمسك للأمجاد مسباق = ألا عديم ٍ حقق القول تحقيق
من راس من جلو عن الروس الأشناق = عـون الرفيق ويحتمون الملاحيق
ألآد روق اللي للأمجاد عشاق = أهل المهار اللي تفك المزانيق
خلو دويش مطير للشرق شراق = وأقفا يهل عبارها عقب ماسيق
وبن رشيد اللي تومر ورى ساق = عقناه بخشوم الرماح الزواريق
لين إنكسر من عقب عقناه وإنعاق = وأقفا يبي منا السلامه تشافيق
وعلى طلال يشالق الروس شلاق = العام يوم يرفرفن البواريق
يوم إنجلع مع فتقة الصبح فتاق = والموت جا لرعود نوه تصاعيق
وانا احمد اللي للمخاليق رزاق= بالقمع فرقنا هل الجمع تفريق
راحوا مثل صيد الخلا طرد ولحاق = تذايروا عنا مثل شرد الهيق
من ضرب هندي ٍ للأرواح زهاق = سيف ٍ طعونه في عدوه مغاميق
يتلونه اللي للفخر ساقهم ساق = ألآد روق مبعدين المراميق
برهاف هند وسرج سابق وسباق = وزرق الرماح اللي ندبهن مزاريق
وشلفن زما مع دربهن كل شوهاق = ماعيق مضربهن عن الروس ماعيق
في نجد حنا متيهة كل مفواق = سهف البكار مولعات العشاشيق
يازينها في سهلة ٍ روضها باق = فيها يهز النود روس الزماليق
لا رايعت حيرانها خلف الناق = وقامت تعوج بروسها للمساويق
وليامشن قامن يزومن الأعناق = مافي بعضهن عن بعضهن تفاهيق
خلاقهن من جوهر الحسن خلاق = أبدع بهن خلاق كل المخاليق
وأنزل غلاهن في جما كل خفاق = عند الرجال اللي تهوز الشواهيق
البل تبي من عانق النايف عناق = اللي بنا لأمجاد ربعه عماليق
اللي يطول وللطويلات يشتاق = شامان بن هايف عريب المعاميق
أنا أشهد إنه فالرياجيل عملاق = وأنا أشهد إنه من ركون ٍ مشاهيق
والشيخ أبو فواز حماي الألحاق = اللي رفع لرسوم ناصر معاليق
شيخ ٍ ضحى جوده لأهل نجد مشراق = في نجد يزمي مثل أبانات وطويق
وقاعد ولد قعدان حر ٍ ليا واق = يرم العشا للحايمات المحاميق
هذاك له طرف أكحل العين تواق = ودايم له أنظار العذارى متاويق
وضيف الله اللي في دجا الليل شعاق = ناره تزم لساري الليل وتويق
ضحوك سن وعنده مزوح وأخلاق = وراحات جوده بالمكارم مدافيق
وبن ثنيان الثنا محتم الساق = عنده ملازيم الوفا والمواثيق
يالبيض ياللي سلمكن حب وإفراق = بالود شومن للزحول المطاليق
جل الفخر مافي عقايدهم دقاق = فيهم تطيع عيون الاشعار وتليق
ولا ترى الروقه هوى كل مشتاق = في مدحهم يازين نظم الطواريق
وبرقا مفاخرهم يسدن الأفاق= أهل الهنادي والسيوف المورايق
وختامها مالاح فالمزن براق = وماماه لبحور السرابه تخافيق
من عمق صدر ٍ لا تجهم ولا ضاق = يضحك ليا صكت عليه المغاليق
سلام ٍ أحلى من مناقيع الأوداق = عقب إنجلى عن خاطري زاجر الضيق