حبيب العازمي




مرحبا في محلات الكرم والكراما

. . . . ثم أقدم عن التأخير كـل اعتـذاري

طلقه من السلاح وطلقه من الحزاما

. . . . ياتصيب السناني ياتصيب المطيري




بخيت السناني





البقا يامرحب عن رفيع المقامـا

. . . . . .فيه مخرج عموم وفيه مخرج طواري

كف رميك ليا جوك الثنين النشاما

. . . . . . . .كم من واحدن وطى سلاحه جبـاري




حبيب العازمي





ياجهينة عليكم برد ولا سلامـا

. . . . . . . . .كم حفظتوا عبارة من حديث البخاري

بينكم فارقن بالطول وانتم تواما

. . . . . . . .مير حنا نعرف غليص ولا مكاري




بخيت السناني





لانخون العهود ولانخل النظامـا

. . . . . .. .وانت سببت عايق للنظـام الـوزاري

ودي انشدك والأوضاع ياما ياما

. . . .. . . . . .منهو الي وضع للسقف عازل حراري




حبيب العازمي





عامرين القصور ولا سكنا الخياما

. . . . . . . يوم فزعة محمد قيلـت بالكبـاري

يابخيت أنت تنشد والقبايل ترامـا

. . . . . .. . . صمم العاقل اللي حزمك بالشباري




بخيت السناني





أحسن تقودها بالنور ولا الظلاما

. . .. . . . . . انتبه من عواقبها ليا جيت سـاري

فيه سلعة تسام وسلعة ماتسامـا

. .. .. .. . . . .... . .وانت ضيعتها مابين بايع ووشاري




حبيب العازمي





لا توصي حريص ولا يجيه الملاما

. . . . . . .واصلك في حدا الثنتين حسب اختياري

الرعد فالجنوب وبارق الغيث شاما

. . . . . . . . .والسنانـي بينبـع يـدور خـبـاري




بخيت السناني





ريس المركز اللي غاب وقت الدواما

. . . . . ... . . .رفعـوا فيـه برقيـة وميـة قــراري

انت واقف بدرب السيل وقت الغماما

.... . . . . . .ومين يوقف بدرب السيل شخص انتحاري




حبيب العازمي





ريس المركز اللي هو عليه الكلاما

. . . . . . . . . .صقر والصقر مايخشى وجود الحباري

يخلف عليم الله مقفية كـل عامـا

.. . . . . . . . .تتركون العنـب وتبيعـون الهـواري




بخيت السناني





حاكمينك رجالن في يديها الزماما

. . . . . . . . .حاكمين الصقور وحاكمين القماري

فيه لقمة حلال وفيه لقمة حرامـا

.. . . .. .. . .وانت تاكل من الثنتين وانت داري