عديت بالرجم ابو لبّة = اللي قيوفه على متونه
رجمٍ به الذيب يقنب به = ومواكر الطير بقرونه
ما اظن قبلي حدٍ طبّه = عسرٍ على الناس يرقونه
صاحه من الطرف مشهبّة = والسدر بأرضه يعدونه
لا جاته الريح منهبّة = يلاعب الريح بغصونه
والجو غيّم وغيب به = غراً من المزن ميمونة
هلت على الارض منصبّة = يهجيك عن وبلها لونه
مسيّره بالسماء ربه = يسحب ربابه على هونه
ميكال كاله من الغبة = وجوا به جنوده يسوقونه
مصنبرٍ كنه القبة = على اول الوسم وحتونه
برقه حقوقٍ يعقرب به = ومن الرعد ترجف ركونه
كن الطفل يوم يلعب به = عرزيل ذودٍ يهجونه
وكسر خياله وجنب به = واقفت هبوبه على امزونه
الضلع والعرق والخبة = والواد ابو دوم من دونه
عني تعدى وانا احبه = نفسي مع السحب مفتونه
ومخايل البرق ما اكبه = لو ان الامة يكبّونه