بسم الله الرحمن مخز الشياطين = اللي بذكره يطمئن الفؤادي
خالق خلق خلقه بنفخه من الطين = واحيا العظام الباليات الهمادي
واسبل عليهم نعمة الأمن والدين = وقال اعبدوني واشكروا ياعبادي
بعده تهيض خاطري واستوى زين = قال احفظ اللي فات واخذ الجدادي
لك عندنا من صافي الجم كاسين = تكفيك فيها كل علمٍ وكادي
قلت انت مطربني من اول وذلحين = دايم تبلغني مناي ومرادي
فيك الطرب يختال من حين لا حين = عزفك على الاوتار عزف انفرادي
اما بَعَدْ يالقارئين الكريمين = فيما يلي يمكن يكون المفادي
ابا اشرح الاوضاع وان كان ناسين = واسند على البرهان كل اعتمادي
حنا العرب حمّاية العرض والدين = المسلمين المؤمنين الهوادي
القائمين الصائمين المصلين = اهل التقى واهل الرضى والمبادي
اهل الطهارة والشرف والنظيفين = اهل المكارم حضر والا بوادي
منّا محمد خير كل النبيين = الرحمة المهداه عن كل هادي
الصادق المصدوق خير الأمينين = نوره سطع ثم اضمحل السوادي
على المحجه حطنا بالبراهين = مازاغ عنها غير هالك وغادي
واصحابه الغر الخيار الميامين = اهل الفتوحات وسنام الجهادي
منهم جموع الروم راحت مزاعين =على ظهور الصافنات الجيادي
وعروش كسرى زلزلتها البراكين = هبوا عليها وتركوها رمادي
مع وقعة اليرموك وقعة اجنادين = وذات الصواري عدّها باعتدادي
والقادسية وانتصارات حطين = والأندلس والعزّ عزّ متمادي
ما بينهم على بعضهم رحيمين = وعلى عدو الله غلاظٍ شدادي
أمجادنا زادت على اهل الدواوين = تكتب وموج امدادنا بازديادي
علومنا شتى بكل الميادين = أصل المعارف كلها باستنادي
علم الفلك والفيزيا والتبايين = والكيميا والطب والإقتصادي
ومنّا شيوخ العلم علم الرشيدين = مثل النجوم الساهرات البوادي
على حدود الله وشرعه محامين = تقدّي الغادي طريق الرشادي
يهدون بامر الله وبامره تقيين = على جنان الخلد دايم تنادي
ومنّا الملوك مزحزحين السلاطين = حكامنا آل سعود بيض الايادي
خُدام بيت الله وريف المساكين = يارب تحفظهم وتحفظ بلادي
على عدود العزّ دايم مقيمين = تشرب وتسقي ضاميين الكبادي
يعيش ابو متعب حبيب الملايين = على يديه الخير فايض وزادي
ومنّا نوادر نجد سقم المعادين = ربعي عتيبه وان نشدت ابن هادي
ابن حميد اللي شلع نجد نصين = يوم الملاحم والوغى والطرادي
وانشد مطير تعزّ علم القحاطين = عن الصباح وما حصل والهجادي
تهوي على الفاتن سواة الشياهين = اللي تلاحق في نهار الهدادي
ومنا شيوخ المعرفة والحكيمين = أهل الشجاعة والكرم والقنادي
أخوان عبده للمعالي مسمين = تزود فوق الزود عند الزيادي
فيما مضى ياطيب الافعال ماضين = واليوم ابو فيصل زعيم الشدادي
ومنّا الرجال اللي على الطيب رابين = يفرح به الزراع يوم الحصادي
استغلظت قامت على السوق تطمين = تغيظ كفار الوفا باشتدادي
اسلومهم ورث الجدود القديمين = تاريخهم بالطيب سهل المقادي
رفيقهم يبقى على الراس والعين = حشمه وقيمه عود أزرق وكادي
ومن حال والا مال تبعد مقفين = تاخذ من العالات موقف حيادي
يغلون لابتهم وبالحيل غالين = من دونهم مثل السيوف الحدادي
اخذوا من العود الوصايا بتلقين = ولا عن وصايا العود اي ارتدادي
وشلون يشطب مجدنا تحت حرفين = من يختزل سمحان وسط القرادي
من لا يشوف الدرب بعيون ثنتين = في نظرته بالطبع كسر اعتيادي
لكن من غفله مع الوقت لاهين = زاد العدو بعدته والعتادي
واعراضنا عما ورد فالصحيحين = وكتابنا الفرقان أصل المزادي
وبعض المشاكل واختلال القوانين = وبعض الخيانه والصلف والعنادي
لكن نبقى رغم ذلك أبيين = والخير فينا لين يوم المعادي
ومن شذ عنا في جهنم وغسلين = جزاه يوم انه عن الدرب حادي
لا تحسبون المفسدين المضلين = منّا وهم عنّا بكل ابتعادي
الوازره ماتازر اوزار وزرين = يرد كل امره عليه ويعادي
ترى التباكي مانفعنا من سنين = ومكمن قوى الأمات فالإتحادي
على الجنايز يكثرون المعازين = وعلى المفاخر من هو اللي أشادي
نغضي عن الزينه ونكشف عن الشين = لوحة شمات مرصعه بانتقادي
الدين يرفعنا وحنا مهيدين = لربما نستاهل إنا نبادي
الناس باللي صار ياناس دارين = يذيع به كل الفضا والروادي
معاد ناقصنا تخاذل وتليين = أصحوا واعوا لا يستمر الرقادي
الإنهزامية حياة الذليلين = والإنبطاحية حياة الجمادي
استبشروا بالخير وادعوا وآمين = الخير واجد بس وين المنادي
وبغداد يابغداد وكر الشجيعين = على الثغور يلاطمون الأعادي
اسقوا علوج الغرب سم الثعابين = وخلوا جيفهم للرخم والحنادي
شم العيال مرجحين الموازين = لاولع البارود راس الزنادي
اللي قضى نحبه عزيز الشهيدين = ومن ينتظر عز السما والبيادي
واذا تطرقنا لنكبة فلسطين = امر الله المعبود نافذ وبادي
أحوالها مابين كرّه وثنتين = إن الذي حاصل لشيءٍ يُرادي
يكفيك منهم منهج الشيخ ياسين = أرعب بني صهيون رغم القعادي
ولبنان ما لبنان ما بينهم بين = مشوا على نهج الكذوب الربادي
واللي بقى معاد يعتاز تلحين = انتم تعرفونه بكل اعتقادي
الشعر مفهومه رساله بتضمين = ماهو سلم مليان قلبه جرادي
كل احترامي للرجال الحشيمين = اللي تدير عقولها بالركادي
ماتاخذ الشكات غير الضعيفين = مع كل صيحه تصطفق باهتبادي
ليته صبر ماثار عج الدخاخين = ولا قام يعزف من مقاطع عبادي
نمشي ونزرع كل وادي رياحين = ويطلع علينا شوك مع كل وادي
كاد المريب يقول خذني وانا وين = ماني بحوله مير جاه ارتعادي
هذا زمان ملخبطين التلاوين = أبيض على اسود لين صارت رمادي
والله ما تعتز دار الحسودين = لو قوموها آيله للنفادي
ومن لا يحق الحق من قوم غاوين = لطالما ماكان رايه سدادي
الشمس والفيه يابو زيد ضدين = ماني بغاوي حرها والبرادي
افهم كلامي ياحسن مدري حسين = ماعشت يارجال راعي دوادي
اقول هذا القول ذكرى وتبيين = واستغفر الله رب كل العبادي