(مــنقول) محاوره جميله بين صاحب السمو الامير خالد بن سعود + تركي 2000
 

تركي الميزاني :

سلام الله سلاماً للعلوم الطيـبه عنـــوان
واعرف معزبه والضيف في حكمة معازيبه
وأنا لي صاحب ٍ ما ينطق الكلمه بلا برهان
أبا سولف معه والعلم يدري به وأنا أدري به

خالد بن سعود :

الا يا مرحبا واهلا بقلطة شاعر المطـران
تراحيب ٍ لها بالصدر تشريقه وتغريبـــه
وانا ياصاحبي مانيب مثلك للشعر مـيزان
ترفق بي توي غشيم وداخلي ريبــــه

تركي الميزاني :

يدوم الك البقا والطير ما يكفخ بلا جنحــان
وانا خابرك صقر وكل صقر ٍ له مخاليبـه
سبحنا في البحور اللي ضن اللول والمرجان
واخذنا ما نبي والوقت ما تصفي مشاريبـه

خالد بن سعود :

صحيح الوقت ما يصفي وتعكير الزمان ألـوان
واشوف الخايبه تعجب وهذي والله مصيبـــه
عدى عند الهزيلة شان والجزلها ثمنها هــان
وسيف الكذب والتهريج اشوف الناس تغزي به

تركي الميزاني :

اشوف اللي تشوفه طال عمرك يالله الغفران
واشوف الناس قامت تبتسم بسنون تركيبـه
لو إن اللي بنى البيت المسمى ثبت العمدان
ما شفنا الريح تلعب بين ذرياته واطانيبـه

خالد بن سعود :

يا كيف الحل والحاله سفينه مالها ربــان
يمشيها الهوى من حيث ما هبت دواليبــه
عربها ترقص وتزفن على حس الوتر والدان
يحسبون المعاني صولها من جاب له خيبـه

تركي الميزاني :

اظن الحل نتركها تهيم بغبة النســـيان
عساها من نصيب القيض لا هبت لواهيبه
لون النابغة مخطي ما عود بالرضى حسان
يكفينا رضى حسان والوقت وتجاريبــه

خالد بن سعود :

انا خابرك ميزاني وربعك كلم شجعــــان
علامك يوم عرض لك هدفها ما تضحي بــه
ترى صمتك عن الغاوي وتصديدك عن الخوان
عذاب ٍ للضمير الحي ولا في هرجتك غيبـه

تركي الميزاني :

انا مثلت فيك القاف ما مثلت فيه فــلان
وطبعي كل مقفي ما الحقه واشذب عراقبه
نبى نبعد عن المنقود والمشروه مهما كان
ولا نفرح على المسلم ليا كثرة عذاريبـه

خالد بن سعود :

أجل بنشدك عن فيل ٍ يحب مغازل النسوان
تضيق ابه الاماكن والمداخل من لغابيبــه
يقول إلهن أنا الساحر أنا الباهر وأنا الفنان
وهو ياكل شنق غيره وكل ٍ داري بعيبــه

تركي الميزاني :

سمعت إنه على كبره يحس بعقدة النقصـان
مجند له رعاة تمدحه وتقول يا طيبــــه
لكن الفيل يبقى فيل يوم إن الحصان حصان
وضلع طويق ما كل ٍ يبى المرقى يعديبــه

خالد بن سعود :

ما بين ممسح الريضان وبين ملهي الرعيـان
غد ما للجزاله دور ولا لاهل السنع هيبــه
الا يال الزمان الشين الا يا ضيعة الوجـدان
نزل في سوق ابن قاسم وكل ٍ قال كم هي به

تركي الميزاني :

من أول كنت يا هداج تيما تروي الضميــان
لكن اليوم جمك ما نذوقه من غثاريبـــــه
لا بد الوقت يكشف من هو الرابح من الخسران
وكل ٍ يلتبس له ثوب في قده يصلي بــــه

خالد بن سعود :

انا يعجبني الشاعر قوي الحبك والبنيان
إلي منه بنى بيته يشوقك فن تقطيبــه
اجاذبه العلوم اللي تونس والخفا ما بان
مثل تركي عساه يفوز بالمليون ويجيبه

لااااااااااااااااااااااااهنت ياطويل العمر وماقصرت والي الامـــــــام انشالله ولا توقف واصل واصل بالمزيد بالمحاااااااااااورااااااااااااااااااااات لانه بالقسم هناا يجد عشااااااااق المحاااااااورة

تقبل مروري

اخوك.....
عبدالله العجمي

لاهنت على المرور يالعجمي ونعمين فيك وفي ربعك

مشكوور


وماقصرت


ومحاورة رائعه من ..........................................

مشكور على المحاوره

وارجوا من الاداره توقيف السناعيس لانه يسبب فتنه بين القبائل

ويجيب كلام هو غني عنه

ومشكورين .......

لوسمحتوا يا اخوان ...... من يفك لنا شفرات المحاوره ؟؟؟؟؟؟؟ :) :) :)

مشكووووووور

ولاهنت

مشكور على المحاوره ولاهنت

مــــــــــــــــــــــــاعليك زود