يافهيد هاك العلم قدحاً من الراس = علمي ترىيافهيد ماهو جديدي
اعرف ترى ان العرق يافهيد دساس = جدك وجدك فوق كل القصيدي
عمك ابو سطام ذيباً وقرناس = قوله على فعله بليا وعيدي
امسك عماد الدين فعلاً بلاحساس = عطفك على امك واجبك ياعضيدي
دينك وعلمك حافظينك من الياس = إذا أدبرت دنياك وقت الجحيدي
لاتفقد الرحمه ولا تكتم انفاس = ربك لطيف ومعتني بالعبيدي
لاتلطم الخدين ولاتضرب اخماس = جلداً على كل المصايب شديدي
امن برب الكون ولا يلحقك باس = ربك قريباً دون حبل الوريدي
خدمه وطنا عز ياطير نوماس = يازينها لو قالوا ابنك شهيدي
اختك رغد حبي لها دون مقياس= خلك لها يافهيد أخواً فريدي
زله رفيق الجنب اقوى من الفاس = ادمح هل الزلات وقدرك يزيدي
خلك مع المظلوم ولا تظلم الناس = وخلك من الشهوات اكبر عنيدي
لاتامن الكاذب ومنطقك بقياس = اعرف ترى كثر الحكي مايفيدي
واعرف ترى بنت الرجل معدن الماس = تجعلك عنتر يوم سيفه يبيدي
بيتك وجيبك فاتح لكل محتاس = خلك مع المحتاج شهم وسنيدي
عيديتي ماهيب تفصيل والباس = عيديتي لو كنت حراً زهيدي
الحر وانا ابوك رجلاً ماينداس = ابغاك دون الحق ابن الوليدي
الحر وانا ابوك يفهم بلا احداس = ما انت بغبياً ولا انت بليدي
عمك تراه الاصل وعمك هو الساس = عمك تراه ابوك من اول بريدي
ماديت في الدنيا وعاشيت الاجناس = مايهمني قول النذل لو يشيدي
هذي مبادي ماهي حبراً في قرطاس = نصيحتي بابوك وارغب مزيدي