جانا اتصال يحزن القلب والعين=يبكي الشيبان قبل البزوره
ومن قبل نسمع بالخبر شبه دارين=من يوم قبل الموت قدم اسواره
ياليت أبو مثعي تمهل لنا حين=لو كان دنيانا مهيب معموره
نبغاه يبقى حيّ مادام حيين=اما يزاورنا والا نزوره
وجهة بشوش للرجال الحشيمين=واليا دخل في مجلس شعّ نوره
شيخ لربعه شيخةٍ تبعد الشين=يرفي خواملهم بماله وشـوره
ملجأ الضعيف ومزبن للمساكـين=ليناشهم من ضيـم بقعاء حروره
جاهة قوي عند الرجال الوجيهين=وأن جاه راعي حاجة طق زوره
ومراجله مهيب دوب القريبين=جمايله تشمل مهيب محصوره
من طيب راسه يدفع الشين والزين=وعسر الكرم ماهاب غبت بحوره
يعطي ويذبح من سمان البعارين=وحيل النعاج اللي كبار ظهوره
شيخ كريم ذاخر له كريمين=يبت يذري من تلجأ بصوره
كلامي اللي قلت به الناس دارين=لكن نحبه والفعول مخبوره
يالله ياللي لك الأمة مصلين=في جنة الفردوس تبني قصوره
تجزاه بالجنة قصور وبساتين=وقصر مزخرف يسكنه فيه حوره
وصلاة ربي عدّ وبل الودادين=على نبي وضح الحق دوره