ابداء وبسم اللي يشرف بمبداه=اللي خلق كل الأوادم من الطين
الواحد اللي فالزمن نطلب رضاه=مادامنا بالعمر باقين حيين
حنا فقارى دوم والرب مغناه=غني عنا لو ملكنا ملايين
إن كان مانرجيه وندور رضاه=عز الله إنا كلبونا مساكين
يالله جنت خلد ياطيب الجاه= مع الصحابه والرسل والنبين
اكتب وأوضح كل شي(ن) درسناه=من آلف وأربع لا ثمانيه وعشرين
يقول من ميز حياته بدنياه=رجل(ن) حكيم وشاعر(ن) بالبراهين
إن الزمان أقصاه مايشبه أدناه=وإن العمر محدود لوهو بعد حين
لوفيه مخلوق(ن) تعمر ذكرناه=مار الحقيقه يوم والناس ماشين
دنياك هاذي وضعها قد فهمناه=مابين حلو ومر والشين والزين
عشنا وشفنا وكل درب(ن) مشيناه=مع كل خلق الله وحتى الموالين
شي(ن) ربينا به وشي(ن) عرفناه=من ناس(ن) أكبر سن منا فهيمين
اللي يخاويني على الطيب حياه=يأخذ مواجيبه على الرأس والعين
إن مدلي بالكف يرجعله املاه=على الوفا عشنا وبنموت وافين
ومن صد قلنا يالعله مقفاه=مانطرده لونشكي الفقر والدين
الطيب الطيب ومبداي مبداه=إن كانها بالعسر وإن جات باللين
وألا الردي معثور والكل يشناه=وإليا مشى دربه من الشين للشين
مابين هالأثنين خصلت مساواه=مادام للميزان فالوقت كفين
ألا إن كان الذيب عود كما الشاه=والحر الأشقر عيشته بالمراحين
كذا بقول إن الزمن ثار فخباه=علم(ن) له الصاحين ترجع مجانين
قول(ن) بدعته ياهل العرف واحماه=واعيد ماقلته بوحده وثنتين
اللي يخاويني على الطيب حياه=يأخذ مواجيبه على الرأس والعين