قبلان ياقبلان وين انته نبا نرقا سنود = على شعاع النور ياقبلان . والساري سرا
بيني وبينك يالعتيبي علم نبغاله شهود = من يوم شفت النار في الميدان . والساري سرا

قبلان حاضر وإرد ياساير على جمّ العدود = تبا تصدّر ياولد رويان . والساري سرا
الشاهد الله والمواطن عن حما داره يذود = يانعنبوها عيشة النقصان . والساري سرا

ماشال بيت البدو ياقبلان ياكود العمود = هذا ترى من ماضي الازمان . والساري سرا
الراس عالي فـ السما والعود في عين الحسود = عندي على قولي مية برهان . والساري سرا

كل الدوّل ماتعترف في دوله بليا حدود = وصية الراحل ابن انان . والساري سرا
ترى الخفاره ياوسيع العرف من قسم الجنود = ماهي بقسم الضابط الفسقان . والساري سرا

الله يعز الدين ياقبلان ويذل اليهود = اللي تقول الزور والبهتاان . والساري سرا
الربح من قسم الذيابه والخساير للقرود = علم فلان وقولها لفلان . والساري سرا

السيل جانا يالعتيبي عقب شيدت السدود = وسدود بيشه بنيها بنيان . والساري سرا
المعركه تزداد لو عباس دقق فالبنود = يبا يفتش سلعة الدكان . والساري سرا

باقي معك شهرين تقدر تخفي آثار الوجود = واللي رضى ماهو كما الزعلان . والساري سرا
رح للمحاكم والمخافر واحظر اثبات وسنود = لا تنقفل من دونك البيبان . والساري سرا