عن إذن الهموم اللي ..خذت خاطري ميدان = تمارس طقوس الحزن بأعلى معاييره
يسوق الفضا ..نسمه .. وانا اشوفها دخان= وتملا عيوني دمع ..واتعيد تكريره
تضيّق مداين صدري ..بزحمة السكان = واقص يم هذيك " الهواجيس " تأشيره
بزوغ الفكر .." كوكب " في " مجموعة " القيفان =يوقف عن التدوير ..و إيعاد تدويره
على الماضي ..ووقتٍ ..يمد العطا نقصان =على الهون ..ياحاسب مرابح مخاسيره ..!!
لو أني شبعت الجوع ..! أبا أقول لك " جوعان " =لا تنشد عزيز النفس وشلون تفكيره..!
ولاآرد شحيح الما ..ولو الضما رويان =تكفي عدود العز عن دلوه وبيره
ولا ارد للأعور.. ليا قاد له عميان = اشوم ويشوم الشوف .. عن شرّه وخيره
ولكن ليا ثار بجبال الشكا بركان = ابوك انت .. وينك ياجلا الهم والحيره
مسافات بعدك تيه .. ومشاهدك أوطان = وانا ضقت من هذا الضياع ومشاويره
تساوى نظر عيني على غيرك و " شتّان " = يساوى.. نفوذك في مدا الحب مع غيره ..!
والا صرت من تالي لكف الزمن عوّان = انا شلون ابا اسكت عنك .. وافضها ..سيره
مدامك وحيد العاصمه وحولك السكان = تخير مبانيها ... ولا تحشم الجيره ..!!
وتجري رياح الشعر .. و إتخالف الربان = ويضحك لها بحرٍ ..وتبكي بوابيره ..!