يا عقاب مدري مدح والبستك اوشـاح=والا الرمـوز يْحلهـا مـن طرقـهـا
يـا سيّـد الزرقـا تعلّـي ومــرواح=لن سقتهـا مـع قبـة الكـون سقهـا
تكّـي بصـدرك للذعاذيـع وارتــاح=وافلـج محاديـب السحايـب وفقهـا
خلّ السواري عنـك وانـزاح وانـزاح=واعلا مراقيـبٍ علـى الجـدي وقهـا
مثلك ليا ستّـل جناحـه مـع الضـاح=وارخى سمار الريـش فـي معتلقهـا
استسلمت كـل الجـوارح لمـن شـاح=عنهـا وجـدّد مـن علّـوه رهقـهـا
سيفٍ ليا جـرّد علـى الصيـد ذبّـاح=وموسٍ ليـا نـاش الضوافـي حلقهـا
اهـواي نجـم وكفختـك بــارقٍ لاح=وتكبيرة الميـت علـى اللـي لحقهـا
وما بيـن مخلابـك وفـلاج الاصبـاح=بيض الثنـادي قبـل يرهـج علقهـا
زوعتك سيل وطعنتـك عَيْلـم ارمـاح=مـن مخلـبٍ واليـا صفقهـا صفقهـا
لا ملت شلت ولا تواسيـت وان طـاح=ضلّـك علـى كبـد الطريـده فلقهـا
والا ليا نشت الخريشـه مـن الـراح=مـا كـن ربـك بعـد تدمـي خلقهـا
واليا شلعت وجالـك صْيـاح وطْيـاح=كنّـك وكـنّ اللـي ذبحهـا وفقـهـا
وصف الاصيل اللـي ليـا لـز طفـاح=هـذي توطـاهـا وهــذي فهقـهـا
عن بعد ( حر ) ولا تقاربـت (سـراح)=وان جيت (عبد) اضنى (الحرار) وعتقها
واخطا عليك مْسمي الصقر يـا صـاح=الحـر وانـت الحـر للـي فرقـهـا
وشلون حـر وجـذب راسـه بْملـواح=عيشه علـى كـف الرجـال وْعرقهـا
وانته سندك عْضود وصْعـود وجْنـاح=وحـداد سـم الطايـره فـي شنقهـا
مـا ذلّـك البرقـع ولا ردّك صْـيـاح=ومن حيث ما تبغى مع الكـون سقهـا

المشاركة الأصلية كتبت بواسطة ابوبجاد الرويس (المشاركة 348192) حياك الله يافواز ولاهنت على نقل القصيدة الرائعه وصح لسان الشاعر خالد العتيبي

المشاركة الأصلية كتبت بواسطة رجا الروقي1 (المشاركة 348349) شكرااااااا يافواز على النقل وصح الله لسان شاعرها

المشاركة الأصلية كتبت بواسطة نجم العتيبي (المشاركة 348463) صح السانك اخوي ولاهنت على القصيده