سلام امن الضمير الي مواقيفة تعز الراس=علي سلم الرجا الي تقدر من يقدر ها
انا اشوف المشا كل والدعاوى فى كثير الناس=عسا اللة يرحم العربان والاحوال يستر ها

هلا يامرحبا باللي علومه كلها نوماس=تنومسني علومك والمصادر من مصادرها
الا ياليت بعض الناس يسمع كلمة الجلاس=عسى عمرك يطول ويتبعك من كان تاجرها

نبا ناخذونعطي معك يالشاعرعريب الساس=ترا الرحله طويله مانبا نقصر مشاورها
اشوف الليل توه وانت جعلك مايجيك الباس=على درب السنع يا صاحبي ودي نسيرها

نبي نشري ذهب والا البضايع كل ابوها انحاس=توقع لاتبيع وتشتري في سوق بايرها
على درب السعد نمشي ولا نبحث عن الاتعاس=تشوف الشاره العليا نبي نصفق صوابرها

انا ماحتار ماني عايشن بين الرجا والياس=اوردها على عد الرواء واعرف اصدرها
ولاياصاحبي كم شاعر يلعبه الهوجاس=لعلك ياعميل الخير ماتعمي بصايرها

نبي نمشي على وضح النقى مانتبع الوسواس=هواجيس(ن)تسندها وهواجيس(ن)تحدرها
ترى بعض الابل توسم بوسم(ن) يشبه الاقواس=وتصبح في حلوق القوم ماتنفع ذخايرها