يالفالح اللي تغني بالمثايل والطروقي =تعال واخذ الكلام اللي يجمّل من يقوله
عامين مدري ثلاثه وانت من سوقٍ لسوقي=مدري كسبت الوصافه ياولد ولا البطوله

حيّا الله الشاعر اللي جاب له قافٍ يشوقي=والناس تحكم على الرجّال من فعله وقوله
انا اكسب الاوله من عادتي وانا ابن روقي=والاوله ما يحصّلها البنادم بالسهوله

ابقا الله اللي على درب السنع دايم سبوقي=والناس لاجبت سيرة شخص قالوالك فعوله
الاوله روّحت ياصاحبي ليتك تفوقي=سرى بها اللي ترك له بصمةٍ في كل جوله

عيني تخيل الخيال اللي ترفّ به البروقي=والظاهر انه ما غير بروق ما تدرج سيوله
قال المثل ما يكذّب علم رجّالٍ صدوقي=لا قلت لك علم ضمّه لا تردد في قبوله

خلك على الهون قبل يفور دمك فالعروقي=وسهيل ودك تنوشه بس ماتقدر تطوله
قلت الك علمٍ مّوثق ياعميلي بالوثوقي=وصلك علمي ونفسك لاتجي دايم عجوله

عز الله اني على خوّة هل الطاله شفوقي=وسهيل حول الجدي والجدي طول الوقت حوله
بين الثرى والثريا كم تعدّ من الفروقي=بحر الوفا والمراجل سابحه عرضه وطوله

عز الله انك معي بالحيل يالفالح خلوقي=لولا الحيا كان وريتك زمانك مع ميوله
شمسك قريّب من المغرب بعيد عن الشروقي=والوقت لومال ماتقدر تكيّف مع فصوله

المشاركة الأصلية كتبت بواسطة الفالح (المشاركة 333394) عز الله اني على خوّة هل الطاله شفوقي=وسهيل حول الجدي والجدي طول الوقت حوله بين الثرى والثريا كم تعدّ من الفروقي=بحر الوفا والمراجل سابحه عرضه وطوله