عدّ ما تبدي النجومٍ وعدّ ما تبد الاهله =مرحبا بالشاعر المعروف من ماض الزماني
يازبن يا مزين الهرجه على فنجال دله=بنّها بنّ اليمن وبهارها بالزعفراني

والله ان الطيب بين مطلعه يالقرم والله= البقاء باللي علومه كلها جزله اسماني
الرفيق اللي سلومه كلها مذهب ومله=والله اني ماشنيته واشهد انه ماشناني

والله انّي كنت اريد ازور خالي في محله=مار خالي جابه الله من مكانه في مكاني
لدّ عينك في سمانا والنجوم اللي مطله=ما لها محصي وعان الجدي وسهيل اليماني

قلت اباشوف البناخي يوم طول وش حصله= مانسيته والبناخي في وجوبي مانساني
شقتلي نجمٍ هوا والا البقيه مستقله= الجدي وسهيل ثالثهم تراه الي دعاني

لا خلاف ولا مخالف والثنا والشكر لله=و اعتبرني واصلك لو عنكم الدرب ايحداني
بيّض الله وجه من شطّب على الموضوع كله=يا وسيع المعرفه حنا بني عمّ وخواني

جعل ماياصلك باس وكل طيبك فاطنله=مرحبابك في محلك يافهيمن فالمعاني
ماعليكم زود واللي فيه شك وفيه خله= مالتفتله لو يقول انا فلان بن الفلاني