نبداء بذكر مدبر الكون تدبير=اللي خلقنا من عدم لى كيانا
واللي بعده انصخر القاف تصخير=مادونه فكري طلع في لسانا
من شان ابو سطام جينا مسايير=مسيارنا كله لاجل من دعانا
إليا دعانا الرجل مافيه تاخير=جينا على وضحى النقا ماتوانا
تسوقنا يمٌه معزه وتقدير=زياد بن حامد رفيع المكانا
يفداه من همه يعد الدنانير=ماقدم لنفسه ياكود الهوانا
ياربعنا ياهل الوجيه المسافير=ترى النفاعي والمقاطي أخوانا
عيال رايق ماحصل منه تقصير=على التواصل ماشقرنا عصانا
حنا في الدنيا سوات المداوير=الله يثبتنا بقوة ايمانا
انته يا بوسطام راع المغاتير=اللي لها تاريخ في مستوانا
في مستوى عتيبه رجالاً مشاهير=تشهد قرارت نجد واكبر اعدانا
ذكرتني بفعول شيخ المناعير=يوم انثنا من دونها باسنانا
فعله تعداء فعل ابوزيد والزير=يوم انها بالفعل هاك الزمانا
شيخ الشيوخ اللي يفك الطوابير=محمد اللي مانزل في طمانا
يرسى كما يرسى ابانات والنير=يشهد على ماقيل كل حددانا
يوم الرحى راح سوات العصافير=هاذي فعول شيوخناً وزعمانا
قولاً علاه اثبات ماهوب تزوير=أنا اشهد أنه من طوال اليمانا
ماقل دل وياعسى الخاتمه خير=على طريق الخير يثبت خطانا
وصلاه ربي عد نواً محادير=يرعد ويبرق مدلهم في سمانا
على نبياً نور الكون تنوير=يشع نور الحق ومنه اهتدانا