ياونتاه اللي بـرت جسـم حالـي= بري الدبا نبنوب غصنٍ تغشـلاه
على عشيرٍ بالمـوده صفـا لـي= وازريت أنوش حماه وانا اتعـداه
غروٍ جبينه مثـل خـط الهلالـي= سبحان ربٍّ صوّره ليـن سـوّاه
وحيـاة ربٍ كمّلـه بالجمـالـي= من مفرق الهامه إلى حد ماطـاه
انه من اوّل وامس واليوم غالـي= واتلى زمانه بالغلا مثـل مبـداه
مالـه حلـيّ إلا مـودّة عيالـي= صغر عيالي بالغـلا كنـه إيـاه
لا ابطيت ماشفته وهو ماعنالـي= عفت المكان اللي يغيظه ويجفـاه
شوفه دواي وقلّ شوفـه زوالـي= حكيـم طـبٍ جـامـعٍ داه ودواه
مابه من العذروب عنق الغزالـي= إلاّ الزمان اللـي حدانـي وعـدّاه
ريقه حلا مـن دَرّ عُفـرٍ متالـي= لا روّحن من مدفقٍ سال مجـراه
هبّي بريحـه ياهبـوب الشمالـي= كُود الجنوب ومطلع الشمس تنصاه
يامـا ويامـا فرّقتنـا الليـالـي= نجعٍ مقيم وفـرّق البُعـد لامـاه
وعضيت بسرة شاهدي من هبالي=وونيت ونة من نقـل داه بـرداه
هنيّ دحـشٍ دبّ الايـام سالـي= ماولعه طرد العماهيـج واغـراه
ولا صلاه امن التصاريف صالي= وذاق الفراق وتاه مثلـي بمسـراه
ياطول ماطاوع نسيم الهـوا لـي= من قبل يبدي لي من الوقت مجفاه
واعتظت من عقب الجديد السمالي= ولا ينفع الفايت ولو قيل محـلاه
ليتي قريـبٍ لـه وبيتـه موالـي=والعلم من بينـي وبينـه مناجـاه
ان كان له بمواجهي مثـل مالـي=وقلبي معه يبـراه والهـم يبـراه
وإلاّ تراني عنه طـاوي حبالـي=يلقى وانا القى واحـدٍ كنّـه إيـاه
مانيب من يتبع خفيـف الخِيالـي=إلى تحدّر بارقه عفـت مرعـاه