الشكر موصول بعد الله لعتيبه = والفوز فوزٍ لهم في كل الأحوالي
متوّجه بالفخر والمجد والهيبه = من ماضي الوقت حتى وقتنا الحالي
فيها الكرم والصخى طبعٍ تثاريبه = عز الصديق وعلى العيال عيالي
خويهم ماشكى الوقت ومصاليبه = في اللازمه مرخصين الروح والمالي
ماحاشت يدينهم تبذل وتصخيبه = دون المواجيب نقاضٍ وفتالي
لو جور الأيام حاميةٍ لواهيبه = ربعي تحدى الزمان وتحتمي التالي
صغيرهم لابلغ تصفي مشاريبه = يرد المنيه ومنه تهاب الأهوالي
اللي نخاهم تحقق له مطاليبه = يبشر بعزه ويصبح هادي البالي
والسيف وش سلته لولا مقاضيبه = والبيت لولا ركونه كان ينهالي
والطير وش نقلته لولا مخاليبه = وشلون لاهد في الحفال يحتالي
والضلع لولا شموخه من يماريبه = يصير لناس مطلاعٍ ومحوالي
يأهل الحميا تراها والله مصيبه = اليا انكسرتوا عليكم صارمدخالي
انتم تشوفون من كثّر عذاريبه = في بعض الاقوال يبدي بعض الاقوالي
وده يعزز بشي وفاله الخيبه = وش عاد هندي ونيبالي وبنقالي
تكفون من يمكم طرش مكاتيبه = عزوه من بين حساده وعذالي
خلوه يرقى عن القاع ومغاريبه = بفعولكم يعتلي في النايف العالي
تكفون لايعتريكم شكه وريبه = ترا التخاذل يحطم كل ريبالي
معاد عنها صدود ولاش تجنيبه = انتم قبيله ممثلةٍ برجالي
وفي غير هذي ترا الجوال ماليبه = والله ليشكي من التصويت جوالي