الشعر لعتيبة ملوك القصايد = من قبل ما تُخلق محابر قلَمْها
تاج الشعر حِزناه من عصر بايد = لين اصبحت ورثه لمن هو لِزمْها
حنا لنا بالشعر مليون زايــد = سلاسل التاريخ تشهد رجمْها
وحنا لنا بالشعر صيد الفوايد = من عهد بن جبران شيخٍ نظمْها
وحنا عتيبة من قديم العوايد = لا صوّت الشاعر يقّوي هممْها
هوازن التاريخ واهل الجدايد = ما هي هبات موزعة من لمَمْها
يا هل الشعروالفهم واهل الوكايد = صقل المعاني من عظايم قيمْها
ما هي دراهم واتصالات ( وايد ) = والاّ مذيعه تصبغ اطراف فَمْها
والاّ عضو لجنة مسوّي محايد = تصْفِق كُفوفه للّحُون ونغًمْهـا
وما هي مدايح كذب لاهل الموايد = وما هي عقولٍ ترتَخي في ذممْها
ما فيك حيلة يابن رزاق رايد = في حفلة المليون واسمك ختمْها
باذن الكريم تفوز والعلم كايد = وترتقي بالعــز قمة هرَمْها
عزوتك من برقا وروق الندايد = في سهلها والبيد واعلى قممْها
ذباحة الحايل سباع الوهايد = لطّامة العايل خفوقٍ علَمْها
لا سار للرجّال بعض المصايد= يحفظ كرامة وزعته عن رِمَمْهَا
ولا سار للرجّال بعض الشدايد = يصبر على الشدة ويبعد سقمْها
يكوي قلوب القوم والراس سايد = ويرفع ثيابه عن مواطي خٍممْها

عبد الملك الخديدي