ياعين لاتبكين ياعيـن ياعيـن = خلك على خبري صبور وقويـه
حتيش لو كبرت من يسار ويمين = مال القضيه غيـر راع القضيـه
تصبري وان رادهـا الله بتزيـن = لابـد ماتفـرج عليـك وعليـه
هذا كلامي ساع راحـوا مقفيـن = اواسي الخفـاق وأفـرك بديـه
ولا وعيت بدمعتن تجرح العيـن = وانا احسب ان ادموع عيني قويه
الهم والهاجوس جيش وسلاطين = قامت تحاوطني سريـه سريـه
ثم دكوا الخفـاق دك البراكيـن = واثنو عليه بشلفتـن حضرميـه
لاياحبيبـي ياعـذاب المحبيـن = وردتني يازين حـوض المنيـه
قد قلت لك ويني انا والهوى وين = وقد قلت لك خافي من الله فيـه
وقد قلت لك لامن بغيتي تروحين = روحي مراحـن مايسبـب أذيـه
ماقد سمعتي في وداع المحبيـن = نار" وعشـاق المحبـه ضحيـه
وشلون باقابل جموع المهنيـن = يوم الفرح والكل عينـه عليـه
تبين خلق الله يقولون مسكيـن = عاشق وسبة دمعته من خويـه
ولا تقول الناس (شبل العداوين) = سالت دموعه والسبايـب بنيـه
ياحلوتي والي خلقنا من الطيـن = اني من رجال الشرف والحميـه
اشيل حملن ماتشيلـه سلاطيـن = واسوق رجلي بين روحه وجيـه
لاكن وداعك اودع القلب نصفين = نصفن معي والنصف الأخر عليه