من هاجس هلت مزونه على شان = رجل من عيال القبائل سعودي
رجل طريح السجن مابين جدران = ومكلبشن ومحجزن بالقيودي
لعبه الشيطان واليوم ندمان =ويقول ياليت العوافي تعودي
يالربع محدن جاهلن وضع بدهان = في حال مايحسده فيه الحسودي
والحاله اللي بين حاكم وسجان = الهم فيها كل يومن يزودي
وانا بناشد كاسب الطيب قبلان = من منبرن للشعر اببعث نشودي
ولاهوب قولن من فلان وفلنتان = من شاعرن يقدر يحشد الحشودي
ونا بسم شيبان وعيال شيبان = قبيلتن فالضيق تبر الكبودي
انخاك واطلبك العفو ياكحيلان = تعتقه قبل يحط وسط اللحودي
وبعتيبه الهيلا نسوق الك طلبان = ونقول تكفى ياعريب الجدودي
برقا وروق مرجحت كل ميزان = جتلك تبى الصلحه كبار الوفودي
وشمر وذي وايل وحربن وقحطان = جولك على سلم النشامى ورودي
ومطير والمره ويامن وعجمان = قالوا على قبلان لا ماتكودي
وبقوم والحرث شلاوى وسبعان = تبغاك تكسب كل فعل محمودي
وبلحمر وبسمر وغامد وزهران = تبذل على رضواك كل الجهودي
وكل القبائل بين حضرٍ وبدوان = فخوذ وايضاً من كبار البدودي
يبغون سمحة خاطرك وانت كسبان = اجرك ترى ماله قياس اوحدودي
ونا بعد ماشفت فالساحه انسان = اللي دموعه مغرقات الخدودي
ضيق علي الصدر واصبحت زعلان = وحلت من الضيقه بقلبي رعودي
عودن يعيش الحزن بشكال والوان = وينخاك تكفى ونت منت بجحودي
ابو السجين اللي عليه العنى بان = يبغى الولد له يالشراري يعودي
يقول هذا اللي بقى ماله اخوان = ويقول تكفى لاتزود نكودي
يابن العتيقي وانت للطيب عنوان = ولاعنك ياقبلان مره محودي
وقف دموعن شققت حمر الاوجان = من كثرها تملا كبار السدودي
ونا اعرفك من نسل ذربين الايمان = والمدح فيكم مايباله شهودي
قومن لكم صولات في ماض الازمان = في عصر يضهر جيده والشرودي
اعتق ولد شمر ولنته بخسران = الاجر فالك ياقوي العضودي

المشاركة الأصلية كتبت بواسطة ناصر الحافي (المشاركة 305076) مقبول الشيباني صح لسانك وبيض الله وجهك ولانستبعد على قبيلة عتيبه والشيابين خاصه هذه المبادرة الطيب لفعل الطيب وكسب الاجر رفع الله قدرك وانشالله يعفي قبلان الشراري عن بدهان الشمري

المشاركة الأصلية كتبت بواسطة مرزوق العتيبي (المشاركة 306145) .. . شاعر المواقف .. مقبول الشيباني .. صح لسانك ... وشعور انساني غير مستغرب.. .... لاهنت ....

المشاركة الأصلية كتبت بواسطة أبو نجر النفيعي (المشاركة 306502) ,, , الشاعــــر : مقبول الشيباني .. قصيدة رائعه وجزله ومؤثره جدا ,, وصح لسانك عليها .. ,, ,