الهيـــــــــــــلا *** منتدى قبيلة عتيبة - هذا المقسوم ..والمقسوم حاصل

ما جاني منْك يا ربي رضيته
وقانع في عَطاك اللي عطيته
أحَمْدك واشكرك والشكر واجب
وَلا غيرك ليَا ضاقت دعيته
يا ربي وانت تعلم بالسراير
وعن علـْمٍ عن العالم كنـَيته
تذكّرت السنين اللي مضت لي
وبيت ٍ .. كل ما حنّيت جيته
ترَكْه اللي تركني ما انتظرني
وأنا ياما على الدرب احتريته
لكنّ الياس من دوني ودونه
ألين الهَمّ بعْته واشتريته
لو انه عني ابعَد من دياره
يحَسْب اني نسيته .. ما نسيته
يَبي يبقى غلاه اللي يخـَبْره
وغلا الغالين من حَيّه ومَيْته
وغلا ارضٍ قد وطت رِجْله عليها
لو انه بعْد قفـّى ما رجيته
مقامه من ورا نجوم الثريّا
ومن بين الضلوع العُوج بَيته
ملـَك فيَّ المشاعر كلـّبوها
وقلبي عن هوى غيره نهيته
على رجْم الهوى كلـّفت نفسي
وعنّيت القدَم حتى اعتليته
أحَسْبه راحةٍ لي وأحْسب اني
أبستانس ليَا منّي بدَيته
وألا يا ليتني ريّحت روحي
وقصَرْت خْطاي عنّه ما رقيته
وطاني ما وطا مجنون ليلى
ودَيني من زماني ما اقتضيته
يا ليته قبل لا تقفي رِكابه
تذكّر وش من ايامي عطيته
يا ليته حسّ فيّ وشاف حالي
وهو يدْري فراقه ما قوَيته
يا ليته قال لي معَ السلامه
يا ليته ثمْ يا ليته ثمْ يا ليته
أبَسْمح واترك دروب المحبه
وأبهْدم كل شيٍّ قدْ بنيته
ولكن جعْل فاللي راح خِيره
هذا المقسوم من سعْيٍ سعَيته
هذا المقسوم ..والمقسوم حاصل
ومكتوبي على وجهي قريته
لو انه تحْت الارْض اظنِّي اسلا
وأسلـِّي خاطري لا من رثيته
لكنه حَيّ .. وعْلومه تجيني
وطيفه وين ما اوجّه لقيته
يا دنيا : انتي من انتي له يادنيا !
حصل لي منْك شيٍّ ما هقيته
سمَحْت مْن الهوى خيره وشرّه
يكفـِّيني مِنه شيٍّ خذيته
معَوّض خير يا القلب المُعنّا
هذا قسْمك لو انك ما اشتهيته
حَلـَمت وضاعت الأحلام منّي
وَهَذا اللي من احلامي جنيته
يا كم وقـّّفت لسْهُوم المنايا
وكم من راس دابٍ قدْ وطيته
وكم ناديت بإسْمه ما سمَعْني
وكم ليلٍ على شانه سَرَيته
عن العالم .. مكانه في عيوني
وقوس الحُب لعيونه بَريته
على وضْح النقا والحُبّ الاول
لو امحِي ذكرياتي .. ما محَيته