بسم الله الرحمن الرحيم

الاخ العزيز ذيب الحنابج بعد التحية ليس بغريب على شاعر الوطن خلف بن هذال ان ياتي بالعجائب فمنذ حرب الخليج الاولى وابو هذال متربع على عرش الشعر اذ سمي منها والى اليوم شاعر الوطن والسلام

مرحبا باللي يسر الحاضرين حضوره=
الجماهير هتفت ساعة حضر والدها=
ليلةٍ فيها ملك يستقبله جمهوره=
بالولاء والحب والترحاب ويرددها=
الفدا له والولا له بيعةٍ مبروره=
لو طلب دم العروق النابضة نفصدها=
مانريد الا رضاه وفرحته وسروره=
امة ما تفرح الا من فرح رايدها=
يستهيض الشعر والشاعر يفيض شعوره=
بالبيوت اللي توارد والروى موردها=
موردٍ يطفي به الوارد عطش وحروره=
الكبود يبلها الما العذب ويبردها=
المليك اللي نسير ونستنير بنوره=
ما غدا الساري وراعي البوصله يرصدها=
حربته في صدر من خان الوطن مسموره=
ويل من طاح بيده يا ويل من هددها=
العدا قامت تموت بغبنها مقهوره=
بارك الله في جنود للفدا جندها=
شرّع الباب الوسيع وجلسته محضوره=
جلسة من عاش معها بالثنا يحمدها=
عادته يطلق رقاب ويطلق الماسوره=
نجدةٍ للشاكية والباكية ينجدها=
من نصاه مكدر باله تزين اموره=
تنفرج وتنوم عين بالسهر عودها=
الكرام نقول في بذل العطا ماجوره=
في سبيل الخير ترعى الناس وتساعدها=
ولولي العهد نفس بالسخا ماموره=
يدفع الحسنات بالحفنات ماعددها=
للكبير وللصغير وللمريض يزوره=
ابو خالد له مكان وسمعه خلدها=
لو نظرت براحته مما انفقت محفوره=
للضعوف المعسره والخاسره يرفدها=
رفرفي يا راية التوحيد يامنشوره=
فوق والله فوق بوثاق العرى جودها=
بالأمان البنت تمشي بيننا مستوره=
يعمي الله عين شيطان يبا يحسدها=
محصنة لا جاهلة مبدا ولا مغروره=
سيرت بخطى الخجول وسترها سيدها=
الجماله والم بارض الخيال اسطوره=
بالقلاده لو عليها نقص ما قلدها=
الورود بدربها يوم اقبلت منثوره=
يالله المعبود من لطفك وعطفك زدها=
مع غنادير البني يا مجمل الغندوره=
ترسم البسمة على الخد النظيف بيدها=
لبسها ثوب الحرير ولا تبين العوره=
ملبس الحشمه وفصل الثوب ماجسدها=
مالها مع ناقل الجوال صوت وصوره=
الحيا والستر عن شر العباد ابعدها=
ما تجيب ولا تودي كلمة محذوره=
تلتزم بالصمت ما واحد وقف ينشدها=
كنها تاخذ من الماضي كرامة نوره=
اخت من صحى قلوب الناس من مرقدها=
طاهره ماناشها الموذي براس ظفوره=
في حمى ما سابقت نفسه على موعدها=
موعد الجمعا براعي عزوة مشهوره=
ضمّها بين الضلوع وعزّها واسعدها=
حطت اليمنى على يمنى البطل مشكوره=
عاهدت عبدالله اللي بالوفا عاهدها=
بالسعادة طال عمره وانتي المعموره=
واسلمي يا مملكة وتعيش ياقايدها=
قايد قدت الوطن للنهضة المنظورة=
ما زرعت من البذور الطيبة تحصدها=
يا زعيمه يا حجاه ويا ذراه وسوره=
عن حدودك محكم قبظتك ومشددها=
يا ولد من توخذ اشوار العرب من شوره=
همّته عليا وهامات العلا يصعدها=
اعلن الوحده واقام الدولة المنصورة=
بالكتاب وبالسيوف الصارمة حددها=
ان غزا غب النكيفة منفد مذخوره=
ما يجيب من الغنايم باليدين انفدها=
الهدف ماهوب في مالٍ يعز عشوره=
الهدف توحيد عربان ماحد وحدها=
في جزيرة تلتهب جوع وضما وخطوره=
يمسي الخايف ويصبح حلته فاقدها=
تقتلب في نجد مثل الذيب قدم سبوره=
بالنهار يصبح المضحين ما يهجدها=
صفحة التاريخ بحروف الذهب مسطوره=
توجت عبدالعزيز ودعوة جددها=
سيرة الفارس تشرف ديرته في دوره=
عن متاهات الدروب المظلمات افردها=
ساقها سوق العسيف وعلق الباكورة=
ماتبا هز العصا حبل الرسن مقودها=
شرعة الله والعدالة منهجه دستوره=
طاب فال الملحمة يوم اكتمل مولدها=
بصمته تبقى على هذا الثرى ماثوره=
والسند حنّا السند بارواحنا نسندها=
أمة الاسلام تشهد حملة مسعوره=
الرجال أهل العقول الواعية تكدها=
الفتن بالشرق الاوسط مثل لعب الكوره=
حارس تدخل عليه وحارس يطردها=
ما اكبر الخطب العظيم اللي تلوح نذوره=
من عدو يقوّم الدنيا ولا يقعدها=
انهضوا يا مسلمين اوطانكم مخطوره=
انقذوها قبل جمّاع الحطب يوقدها=
العرب فيما يحيط بها ماهي معذوره=
ما تثبت حجة الظالم ولا تجحدها=
الحوادث نزلت قيصر من المقصوره=
مع ملوك جت وراحت ما ادركت مقصدها=
اهملت واتحملت غلطاتها المذكوره=
حكمها بالظلم من سلطانها جردها=
شاهدوا ما يكتب الطالب على السبوره=
دمعة الطفل اليتيم بقصة يسردها=
بالعراق يدور حرب خارج عن طوره=
امتلت منه المقابر والأسر شردها=
التعازي والمخازي والبلد مذعوره=
صاح فيها البوم وسباع اللحم تافدها=
امرحت بغداد من سكانها مهجورة=
خطة بليس المضلل بالحيل مهدها=
الوتد دقه جحا عادت عليه عصوره=
ما تزاح ولا تزحزح ورطة وتدها=
فكنا الله من غثاه وحربته وشروره=
عرضة المشؤوم دايم ما تحل عقدها=
الخصيب ارض الحضارة محرقه مقبوره=
سود الله وجه نذل بالردى سودها=
معلم قام يتحطم في النهر بجسوره=
فتنة بين الطويف غايب شاهدها=
من سنين وهكذا حرب وخراب وثوره=
كلما تصلح يجيها طاغي يفسدها=
اصبح الشعب المعذب يدفع الفاتورة=
كل ما تجهز جنازة قيل له سددها=
يلهث المحتاج للوجبة ورى مقدوره=
عالم جاعت وضاعت ضايع مرشدها=
الغدا نصف الرغيفة والعشا شابوره=
عقب كانت تزبر الانعام وتبددها=
الخنا والبذخ والاسراف فيه ضروره=
كم غرير غرته واليوم ما ياجدها=
مادرى الجاهل عن احداث الزمان وجوره=
ينزع الله نعمته بالشكر ما قيدها=[