قصيدة الشاعر\ عبدالرحمن الخميس=
لوانك صدفت اللي صدفته يابو سلطان = من الوجد كان تتابع الونه الونه
صدفني هناك اعوذ بالله من الشيطان = ورماني بنجل ٍمن رمنه يصيبنه
سبحان الله الخالق مصور هاك الانسان = عطاه الجمال اليوسفي مالحد منه
جميل الوصايف والبلى مقرن الحجان = وسود ٍعلى الاوجان يضفي هدبهنه
خدود وجعود ٍسود تضفي على الامتان = وعيون ٍتشوف الموت منهن وفيهنه
وعودٍ يميل وينهصر مثل غصن البان = وردوفٍ لايمن سار ثوبه يقلنه
الا يابعد كل ا لبشر ياهاك الثمان = ليا من تبسم راح قلبي معاهنه
انا ماهقيت انسى هوى مدمج السيقان = لو انسى حلوم الليل يمي يجيبنه
انا اذا هب نسناس الصبا حرك الاغصان = تذكرت غروٍ مثل وصف القمركنه
انا مابرى حالي وسبب لي الاحزان = الا اللي هواي وخاطري فيه واحنه
انا ويش اسوي صابني طرفه الفتان = ذبحني ذبحني مابها قولة اظنه
قضى الصبر عندي مابقى للصبر مكان = وعيون المهاوي تو جاهن بلا هنه
وانا مقدر الفرقا ولا اقدر على السلوان = وجفا البيض هم ونار ووصالهن جنه
انا اخشى من الفرقا ومال الزمان امان = اخاف الليالي والمقادير ينحنه
انا من غرام الغيد ذقت العذاب الوان = الا واعنا قلب العنا من عناهنه
ينام الخلي من الهواجس وانا سهران = واجاهد صوابي يابن الاجواد واكنه
انا والنجوم الساريه والسهر خلان = اعد النجوم الساريه في سماهنه
اعاني من الوحده ومن لوعة الحرمان = وعيوني غزير الدمع دايم يهلنه
ودنياك مادامت لحي ٍمن الحيان = ومن اضحكت عجلات الايام يبكنه
كديميس وش الراي ياشاعر العتبان = ومثلك دروب الحب قبلي مشاهنه
بعصر الشباب اللي مضى لك هاك الزمان = يوم انك تغني في جزيرة جبل قنه
تمنى مخاوات القمر للقمر يافلان = لوان المناوي ماحدن قبل غادنه
عقب منت معهن في زمان ٍمضى طربان = بشرق الجزيره خذت سجات معهنه
وراهن دفعت الغوج يركض بدون عنان = وقلبك عليهن مقرع ٍكانه الشنه
وذالوقت هنه وان يالعود وانته وان = ياليت الليالي ماخذنه يردنه
جعفت الشداد وطاوٍ رشاك ياكحيلان = ولا عادلك يالعود شف بهواهنه
هذا اللي جرى لي يالاخو والمقدر كان = ويالله رضاك بختم الا مثال والجنه
رد الشاعر\كديميس على قصيدةالشاعر\ عبد الرحمن:=
هلا بالكتاب ومن كتب بيته المليان = اديب ٍيعرف الشعر والشعر من فنه
وصل من دحيم كتاب فيه البيوت سمان = كمنه عسف عوب القوافي واطاعنه
وصلني كتاب فيه شكوى من الزمان = يخاف ان دورات الليالي يغدرنه
ويبي الراي من عندي عن النجل والوجلان = يحب البنات المترفات ويحبنه
حسب ماتبين لي وانا مامعي برهان = اظنه ضمن من كان ظنه على ظنه
اظنه سلك درب الدجيماوابن بدران = وطريق الهوى ماثور لكن به لنه
ترى نظرة الصدفه رسايل بلا عنوان = تهز المشاعر والمهاوي يتلنه
مثل بيت عاجل لانوافذ ولا بيبان = جمال وضمير مستتر من درا عنه
لوانك حفظت اركان الايمان والاحسان = وقريت الكتاب وما تيسر من السنه
عرفت الحروف اللي بهن محكم البيان = وعرفت الحروف اللي بالادغام والغنه
اخيرا لك من طرد الهوى كاينٍ من كان = واخيرا لك من شوف الثمر هيله وبنه
ترى العز والناموس في طاعة الرحمن = هذا الراي وانت مخير في حداهنه
واشوفك ترست الصاع بالملح والخفان = وتعد الهجوم لماضي العود وتشنه
تعرضت عودٍ حافظٍ خمسة الاركان = ومضى له زمانٍ مثل غيره وفي سنه
اخذ له سنين يصارع الربح والخسران = يتحدى الليالي والليالي يتحدنه
وغزى مع مهنا مرةٍ مع قرى الصمان = وتعرض حثاث القاع في لا هب الكنه
على ضامرٍ ملحية الساق والذرعان = طرف زورها ذرعانها ماينوشنه
وبعدماوصل مع صاحبه حروة الغزلان = رجع عن قليل المعرفه راعي العنه
وعطاه الذلول وبندقٍ كانه الثعبان = وذكرله صفاتٍ في الجوازي يغرنه
ترى شمهن يغلب على الشوف بالاعيان = وترى سمعهن لو تكسر العود يوحنه
وتراهن يحبن النوازي عن الطمان = جميع المحل المنخفض مايداننه
وليا عاوداًذي فرصة الرامي الفنان = لياصار مايرمش ليا ارسل سهم هنه
ومشى يم مرقاب الشقى طامعٍ زملان = وتغره رسوس المسبعه وانسه وجنه
وبعد ماارقب المرقاب واشرف على الجيان = لقى الريم في الصدر المناحر وشافنه
وتقافن وراهن كن بطرافهن جنحان = وركض قصده الملقاف لكن فاتنه
ورجع لذلول وخمها وانطلق عجلان = يحث المطيه واكتفاهن باثرهنه
وعطن متختخٍ يطرخ سرابه كما الغدران = ولا من نشد له واحدٍقال مرنه
وتجرع قراطيع الغميضه بلا ميزان = هذا المكسب اللي حصله من وراهنه
انا مالقيت احسن من الأمن والإيمان = ولأقرد من اللي دايمٍ همه يتنه
وانا ماوصلت لمستوى شاعر العتبان = علامات راع الدرس يعرف عددهنه
لكني لايا شان اللغى واحتمى الميدان = اشارك عيال العم في معتلج هنه
ويجي للزز ميدان والاالتفق نيشان = ومن لا طرد شهب الذيابه تعشنه
ختمت الرساله باشقر المسك والريحان =وعسى اللي جلب قطف الزهر يشتري هنه

.............

صح لسان كديميس وصح لسان الخمـيـس

والله لا يهيتك يانامي كما عودتنا مشاركات جزله

الله يعطيك العافيه

وغـزى مـع مهنـا مـرةٍ مـع قـرى الصمـان= وتعـرض حثـاث القـاع فـي لا هــب الكـنـه
علـى ضـامـرٍ ملحـيـة الـسـاق والـذرعـان= طــرف زورهــا ذرعـانـهـا ماينـوشـنـه