قال المغني وان بدا فالنايفات = في قنةٍ عديت روس هضابها
وابدع لحونٍ كنها سكر نبات = مثل المعاسل في علو اوقابها
واخيل اللي مقفيات ومقبلات = والله عليم بالنفوس وادرابها
ترى الهوا يالقلوب الفاهمات = عدة معاني مايعد حسابها
وترى الهوا فالخشايب ناصفات = اللي قطرها يقتدي مضرابها
وترى الهوا اللي فالوسوط مصقلات = دون الدخيل اليا قضبت انصابها
وترى الهوا نجر دلاله مكرمات = على الوجيه البادية يمشابها
وترى الهوا في الليال القاسيات = ليا لقى شاة المربي جابها
وترى الهوا خضر الودايا الناعمات = اللي تلامس بالجريد اشذابها
وتر الهوا فالمباني ناصحات =اللي عريب ساسها وانسابها
وترى الهوا ذود وسومة لايحات = ترعى الخرايم خلفها واصعابها
وترى الهوا هجنٍ تهايف منكفات = تصبح بحان الدم فوق ارقابها
وترى الهوا اللي في يده اربع ميات = يوم الثريا لجلجن اعشابها
وتلرى الهوا في الصروح الداجيات = يوم الهبايب ذعذعت ملهابها
هذا الهوا ماهوب تبع البايهات = نثارت الريحان فوق اسلابها
هذه فعول اهل العلوم الطيبات = واللي يبي باقي العلوم ادرابها
واخير منها اللي يقيمون الصلات = وايات ربي حافظين كتابها
وكسب الحلال وترك كل محرمات = وطيب الصفات اللي تعز اصحابها
وصلاة ربي عدة اثمار النبات = على نبي سنته يمشى بها