جابتني القدره على درب مشروع=وقابلتلي غرو من البيض فتان
حرام ماقد شفت زين بهالنوع=حورية الجنه على هيئة انسان
يوم انطحتني كن في صدرها شموع=وكن المعنق يصطلي غيه نيران
وشبهرتبه جسم به النور مسطوع=وعنق زهابه عقد لولو ومرجان
حورية التوصيف والجسم مربوع=والعين سوداء كنها عين شيهان
والجسم عود اراك ماجاله فروع=عنق وطول وردف والعود ريان
ونهد نبا بالصدر ماهوب مرضوع=في صدرها نابي كما طلع رمان
شفته من المفصل اليا حد هالكوع=ومن ركبته اليا حد ماطاه لي بان
حرام ياعيني تشوفين ممنوع=والله محرم كشف عورات الابدان
لو كان ماشفتيه ماجاء على الطوع=لكن له حد على القلب بيبان
شفته وانا سالي وعدت مفجوع=وامسيت عقبه بالتفاكير عمسان
قالت حسن منه السخا دوم مفجوع=بالله ريّع ليه يازين عجلان
قالت بدوي ثوبك على المتن مرقوع=فاتك زمانك تتبع الابل والضان
واليوم مالك فالبلد واحد اسبوع=طامع بغالية الثمن وانت فقران
قلت حدك والغلط وقال مرجوع=زعلت ويا شينك اليا صرت زعلان
قلت بدوي يابنت والراس مرفوع=والبدو اهل شيمه وقيمه وفرسان
وانا بدوي شبري ترى للردي بوع=واضرب على الكايد ولانيب بحلان
وحب الابل يابنت بالقلب مزروع=وهايب الرحمن حلوات الالبان
لو مامضى من دونها نلبس دروع=نرخص لها الارواح في كل ميدان
ومن جابها طامع صار مطموع=ومن فعلنا ومن دونا شبل سرحان
واليوم امان وامن ماعاد ابه روع=واللي بهم روعات في وقتك ابدان
(وانتي ترى خيرت اساميك دلوع)=(تستاهل التدليع في كل الاحيان)
قالت بغيت امزح وسويت مشروع=وانا اسفه والله مالي بها شان
والبدو اهلن لي ولي معهم ربوع=واليوم منهم ومعهم اليوم قطان