من عقب ماشالت المرباع=جانا على الصيف مازعها
ابوعتابه طويل ذراع=سود العشاير مدلعها
ماهوب عيه ولاقرقاع=وان خاصم اخصام يقنعها
الصارم النادر البتاع=ماردها في مزارعها
وسم الرويكب عليه اقناع=على مقادم متالعها
راع البل المهتم الجزاع=بالقيٌد ماهو مذرعها
يقطع افجوجٍ طوال وساع=والارض تقرب مراتعها
من نازح البعد تقل اوجاع=قامت تكابع ضوالعها
يرعى الزهر مايبا الزراع=والشرشره في مناقعها
مثل الحميدي بذكره شاع= اغرف ووضحٍ مسنعها
وضحٍ كما البارق اللماع=بيضٍ مزونه زوابعها
ربعٍ لهم فالجهل مصراع= فالقوم مكبر مقالعها
سلايل الفارس القطاع=للظبي شايع مراجعها
ماقالها واحدٍ خداع= ذي كلمة الحق واطلعها
دغالبه غالبه واسباع=والخيل تنقا طلايعها
يوم الشرود انخلع مرتاع=جزل الغنايم قلايعها
لوهاب من سرجها الرعراع=النار دايم نولعها
الهم على النايفه مطلاع= ماضاق بالطيب شارعها
وكل القبايل تكيل الصاع=وتاريخها في مرابعها
والطيب عند العرب نباع=والمخطيه مانشجعها
من فرق الربع قالو ضاع=بين النجوم ومطالعها
حنا العصا قاضبات اصباع=وجذورها كف جامعها
وافعال ربعي خبرها ذاع=العزوه الي يزعزعها
يالشعر اباخذ معك ملواع= مني ولانيب طامعها
ماهيب للمشترى والباع=من قدح الافكار مبدعها
واشفق على المشكل الصعصاع=واضفي ثيابي مامزعها
قصيدة تلحق النجاع=يسمع سعد ثم يسمعها

مشعان غنا وانا سماع=قصيدة القبع ماروعها
محكومة القاف والابداع=ايهيض الفكر مطلعها
سمعتها حزة المهجاع= والعين عافت مهاجعها
عبر البلاتوث والمذياع=جزلات الابيات يصنعها
تصخير من شاعرٍ طلاع=دايم عن الهزل رافعها
فزيت في ردها بسراع=وعاداتنا مانضيعها
بنات الافكار لي خضاع=مانيب بلي يرقعها
والشعر لاهل الوفاء مطواع=شرد المعاني نطوعها
بحرٍ غزيرٍ ولاله قاع=غبه ولاكل يقطعها
ياكود قرمٍ لها مولاع=سود الليالي يصارعها
يالشعر لو مادعاني داع=حبيت اجاري رفايعها
لاهنت يالشاعر المفزاع=الطيبه منك منبعها
دايم على الوافيه بداع=مبدع وتصخر روايعها
يانسل ربعٍ لهم مرماع=انكان شبت ولايعها
الطيب والعز والاسناع=طبايعٍ من طبايعها
وقفاتهم تشفي الاوجاع=ماهيب تذخر فزايعها
وفعول جدك طويل الباع= لاغارت القوم يردعها
سيفه لروس العداء شلاع=بالسيف مشعان يشلعها
دغالبه فالوغاء قضاع=لا ماتغير روابعها
ياكم حريبٍ لها ينصاع=القوم تشهد وقايعها
يوم الردي للغبن جراع= وسموم الايام يجرعها
حنا لخيل العداء قلاع=الخيل بالسيف ننزعها
والطيب عند العرب بجماع=من ماضي الوقت يجمعها
وفعول ربعي ماهيب اطماع= امثبته في مراجعها
واليوم امنٍ وزين اوضاع=امن ورخاء والسعد معها
في ضل من سيفهم نزاع=حكامنا الي نبايعها
تمت وقافٍ بنيته طاع= ابيوت شعرٍ موقعها

المشاركة الأصلية كتبت بواسطة مرزوق العتيبي (المشاركة 283267) ... . فالحقيقه قصائد شامخه كشموخ شعراءهاااا ابدع ابو نايف وهذي عوايده وابدعت يانايف ولاهوب مستغرب.. .. اسجل اعجابي بهذه الروائع . ....

المشاركة الأصلية كتبت بواسطة أبو نجر النفيعي (المشاركة 283275) .. الله الله الله قصائد جزله ورائعه جداً . . فصح السان ابو نايف.. وصح السان الشاعر الرائع نايف :) ونطالبك بالمزيد يالغالي.. اخووك. .

المشاركة الأصلية كتبت بواسطة مقعد الدغيلبي (المشاركة 283451) ابن العم والشاعر المميز نــــايــــف الحمـــــيدي قصيدة ابو نايف جزله والمجاراه مبدعه ومذهله ولاهي غريبه من شعراء بحجمكم لله دركما ياعصاااابة راسي مبدعين وجزلين لكم شكري وموووودتي

المشاركة الأصلية كتبت بواسطة فيصل المسعودي (المشاركة 283598) قصائد جزله استمتعنا بقرائتها صح لسان ابو نايف وصح لسانك يانايف تقبل تقديري أخوك فيصل النفيعي