البارق اللي عن سمـا الشعـر ماغـاب=اروى الهجـوس النـادرات الثميـنـه
لوماحسبت لسيلـه العـرم بحسـاب=امداه هـد السـور واغـرق مدينـه
ضربت في منبـت رياحينـه اطنـاب=وقطفـت مـن يشمومـه وياسميـنـه
بعطـر انفـاس المسامـع باالاطيـاب=حـق علـي البستـان لمشاهديـنـه
ومدام في الموقف مزاحـم بالاجنـاب=انـا جنوبـي فـي الموقـف متيـنـه
بلخبـط اللعبـه علـي كـل لعـاب=والعلـم مايخفـي العقـول الذهينـه
معاد في نفسي علي المخطـي اعصـاب=ومحرفـيـن الـقـول ومصرفيـنـه
يامضيعيـن الحـق انـا فيـه طـلاب=والحـق مايصعـب علـي طالبيـنـه
ومن يضحك بعينه وكشر بـا لانيـاب=ماهمنـي نابـه ولا ضحـك عيـنـه
يكتبني التاريخ فـي صفحـه اكتـاب=وانـا المـداد لمـا تخـطـه يميـنـه
احد ٍ ملا عينه مـن فعولـي اعجـاب=واحد ٍ مـلا قلبـه سـواد وضغينـه
واحد مصدقني واحـد قـال كـذاب=ومصدقـيـن الـقـول ومكذبيـنـه
أصبحت لاسماهـم مفاتيـح وابـواب=كـلٍ يسمـي بيـن نفسـه وبيـنـه
وامسيت في ماساتهم كـل الاسبـاب=وانـا عيونـي مـن الماسـي حزينـه
يسريبـي الليـل المحمـل بالأتعـاب=واكمـل المشـوار لاشـرق جبيـنـه
شفت اختلاف الكره في وجه الاصحاب=مثل اختـلاف الـود بـأول سنينـه
الناس مثل ابل ميـه مابهـا اركـاب=بالكـاد راحلـة ٍ تشيـل الضعيـنـه
كم من يدين شغلهـا فتـل الاشنـاب=وكم من شنب بعـد الفتـل حالقينـه
تكسرت في عيوننا كسـر الاكـواب=اعتـي الحصـون النايفـات الحصينـه
مانجتمع حسب الجناسـي والانسـاب=حسـب اتبـاااع الاعتقـاد ويقينـه
حديثنـا سحـر المسامـع والألبـاب=وينـزل علينـا مـن سمانـا سكينـه
وترى أختصار القول عن بعض الأسهاب=اخيـر لمـدور رضــي سامعيـنـه