بديت بسمك يا ولي المقادير=بأمرك يسير الكون يا عالي الشان
بيوت مختاره من الشعر تعبير=إخترت من قيفانها غالي الأثمان
صدر قرار النقل ما فيه تأخير=ثقه من القاده بعلمٍ وبرهان
حان الوداع ولا تفيد التفاكير=دنيا تفرق بين ربع وخلان
مبروك ياللي للعلا دايم تسير=حرٍ شهر في طلعته صيده سمان
نرجي لك التوفيق والعز والخير=من واحدٍ يعلم بكونه وما كان
قرار نقلك كدّر الناس تكدير=كلٍ على خوتك حرصٍ وشفقان
سنين في ينبع لها جار ومجير=شجاع في الموقف وللعدل ميزان
بأحداثها سطّر لك المجد تسطير=قايد حكيم حايزٍ كل نيشان
برجال في اللازم سيوفٍ بواتير=كلٍ يسوق الروح دون الأوطان
الفعل واضح ما يبى زود تفسير=كلٍ يشوف الفعل بالضدّ قد بان
فزتوا بها بالطيب عزٍ وتقدير=وسام فوق الصدر في كل الأزمان
نعمٍ بأبو فيصل تردد بتكرير=حاضر وغايب نعم تقرن بفيحان
فيحان بن ناصر زبون المخاسير=متسلسلٍ طيبه وجدّه جعيلان
دون الخوي ياقف كما سالم الزير=يردّ حقه كاملٍ دون نقصان
ذرى الخوي عن بردها والمعاصير=مثل المحامي يشرق الخصم ما لان
كتيبةٍ نالت تفوق وتطوير=حرص وتوجيه مع إخلاص وإتقان
تضرب بها الأمثال قدم الطوابير=بالعلم والتنظيم ورجال شجعان
من غير قاصر بالرجال المشاهير=أهل الوفاء والطيب في كل ميدان
أرجو السموحة كان بالقيل تقصير=ما أوفى قصيدي مدح ذربين الأيمان
وصلوا على اللي دمّر الكفر تدمير=محمد المختار من نسل عدنان